Шыже пагытын икымше кечынже моло ийласе семынак Россий мучко тунемме верлаште Шинчымаш кече пайрем эрта.
Тений элыштына школ парт коклашке 18 миллион наре тунемше шинчеш, тышеч 83 тӱжем утлаже – Марий Элыште илыше ӱдыр-рвезе-влак, нунын кокла гыч 6 тӱжем наре икшыве илышыштышт икымше гана школ лондемым вончат.
Йошкар-Олаште шинчымаш тӱняш ӱжшӧ йыҥгыр таче 34 200 ӱдыр-рвезылан йоҥгалтын, тышеч икымше классыште толшыжо – 2928, а латикымшыш вончышыжо – 1015.
Кӱшыл да кыдалаш профессионал образованийым пуышо тӧнежлаштат пайрем шӱлыш озалана, студент-влак черетан у тунемме тургымыштым вашлийыныт.
Г.Кожевникова
Екатерина Медведеван фотожо.
