Пытартыш кум ийыште Марий Элыште школым тунем пытарыше-влак кокла гыч Иктешлыше кугыжаныш экзаменлан (ЕГЭ) химийым, биологийым, физикым, тыгак профилян математикым ойырышо шукемын.
Профилян математике дене экзаменым кучышо ӱмашсе дене таҥастарымаште 2 процент наре кушкын. Тудым тений 1,5 тӱжем еҥ ойырен, тидыже чыла выпускник гыч 60 процентше лиеш.
Физике дене ЕГЭ-м 699 тунемше кучен (чыла выпускник гыч 26 процентше), тышеч 11-ше 100 баллым поген.
Биологий дене шинчымашым 463 ӱдыр-рвезе ончыктен. Тидыже 2024 ийысе деч 59 енлан шукырак. 100 баллым тений ик выпускник поген.
Ӱмашсе дене таҥастарымаште химий дене ЕГЭ-м кучышо 45 еҥлан шукемын, ты гана чылаже тудым 372 выпускник ойырен. 6 выпускникын результатше – 100 балл, 2024 ийыште тыгайже кумытын лийыныт.
Но икмыняр предмет шотышто вашталтышат лийын кертеш, молан манаш гын кеҥежымсе экзамен кампанийлан иктешлымашым июль мучаште гына ыштат.
Г.Кожевникова
Фотом Марий Эл Образований да науко министерстын соцкылысе лаштыкше гыч налме
