Марий Элыште у коронавирус инфекций дене кылдалтше сӱрет ончычсо семынак начар. Больницылашке эмлалташ пыштыме черле-влакын чотышт огеш изем, мӧҥгешла, пытартыш жапыште кугемеш веле. Мутлан, 27 сентябрьыште республикысе инфекционный стационарлашке 131 еҥым кондымо – тиде чот чумыр пандемий пагытлан шкешотан рекорд.
28 сентябрьыште Оршанке районысо рӱдӧ больницыште у коронавирус инфекций дене черланыше-влаклан медицине полышым пуымо 90 койкым почмо. А регионысо 10 медицине организацийыште тыгай пациент-шамычлан чылаже 1285 койкым ойырымо, ты чот гыч 19 процент ужашыже гына резервыште кодеш, молыштыжо черле-влак эмлалтыт.
Коронавирусын неле формыж дене черланыше, ИВЛ-аппарат полшымо дене шӱлышӧ пациент-влакынат чотышт тургыжландараш тарата.
Черле йоча-влакынат чотышт кугемеш. Мутлан, 28 сентябрьыште Йоча республиканский клинический больницыште 29 икшыве эмлалтын.
Кызыт у коронавирус инфекций деч вакцинацийым поснак кӱлешанлан шотлыман. Прививкым илыме верысе медицине тӧнежыште, предприятий ден организацийлашке лектын коштшо пунктлаште, Йошкар-Олаште Сеҥымашын ХХХ идалыкше лӱмеш тӱвыра полатыште верланыше Вакцинаций рӱдерыште ыштыкташ лиеш.
28 сентябрьыште Марий Элыш Гам-КОВИД-Вак вакцинын эше 13400 комплектшым кондымо.
М.ИВАНОВА