27 июльышто Марий Элын Мер палатыж ден регионысо мер организаций-влак шушаш сайлымашым эскерыме нерген кум шӧрынан вашкелшыкым ыштеныт.
Ӱмашсе дене таҥастарымаште тений йӱклымаш ик кечыште – 11 сентябрьыште – эрта. Эртыше ийын эскерыме пашашке 20 утла мер организаций ушнен гын, тений – латкудыт. Нунын коклаште палемдыме корныш икымше гана шогалше-шамычат улыт, мутлан, «Лӱдыкшыдымылык школ» мер толкын. Тиде арнян политический партий-влакын регионысо пӧлкалашт вашкелшык дене келшымыштым пеҥгыдемдат. Сентябрьыште нуно чыланат йӱклымаш годым правил-влакым шуктымым эскераш тӱҥалыт.
– Таче мер эскерымашын пашажым Мер палатылан закон дене пеҥгыдемдыме. Вашталтыш моткоч кӱлешан, молан манаш гын ме тидым тымарте мер калыкын тӱҥалтышыж дене ыштенна. Мер эскерымаш йӱклымаш кечын эрта. Тендан пашада мыланна моткочак кӱлешан, вет кажныдан шеҥгелне ӱшанле эҥертыш семын посна граждан ден меръеҥ-влак шогат, – манын Мер палатын председательже Герман Дементьев республикысе мер организаций-влакын вуйлатышышт ден йыжыҥъеҥыштлан. – Эскерыше кажне еҥ йӱклымаш кечын лачшымак мом ыштышашыжым сайын палышаш, сандене ме молгунамсе ийла семынак нуным ямдылаш тӱҥалына. Сайлымаш иквереш тыршымына дене кӱлеш кӱкшытыштӧ эрта манын ӱшанем.
Вашкелшыкыште пашам пырля ыштыме икмыняр корным ончыктымо. Нунын кокла гыч ик эн тӱҥжӧ – вашла каҥашымаш, тылеч посна – опыт дене палдарыме шотышто ик проектым илышыш пуртымаш, мер калыклан йӱклымашым эскераш йӧным ыштымаш, умылтарымаш пашам шуктымашке тӱшка увер средстве-влакым ушымаш.
– «Марий калык конгресс» регионысо мер толкын Мер палате дене ыштыме вашкелшыкым сайлан шотла. Тиде шушаш сайлымашыш мер толкынымат ушаш йӧным пуа. Ме калыклан сайлымашын кузерак эрташ тӱҥалмыжым умылтарен шогышаш улына, эсогыл шке ушемысе еҥ-влакым эскерыше семын ямдылен кертына. Рашынрак каласаш гын, кажне еҥлан шке граждан позицийжым ончыкташ, закон дене келшышын, мер эскерымаш пашам шукташ правам пуэна. А мемнан пашана – калык деке сайлымаш дене кылдалтше чыла уверым намиен шукташ, шке граждан порысым шукташ кумылаҥдаш. Тидлан ме оласе гына огыл, районласе активнамат ушена, – палемдыш «Марий калык конгресс» регионысо мер толкынын исполкомжым вуйлатыше Владимир Матвеев (снимкыште).
– Пӧлкана мер эскерымаште участвоватлаш ямде. Куснылшо тӱшкалашке ДОСААФ-ын йыжыҥъеҥже-влакым ушаш палемденна. Вашкелшыкыш кидпалем икымше гана пыштенам, но чылажат сай лиеш манын, кокытеланыде ӱшанем. Шушаш сайлымаш тылеч ончычсо семынак кугу кӱкшытыштӧ эрта шонем, – ешарыш Российын ДОСААФ-ше регионысо пӧлкан председательже Вячеслав Тихонов.
– Сайлымаш годым организацийна ӧрдыжтӧ шогаш огеш тӱҥал, ме мом кузе кӱлеш, тудым тугак ыштена. Газет, радио да телевидений-влакын Марий Эл Республикым вуйлатышын постышкыжо кандидат-влак нерген кумдан палдарымыштым сайлан шотлем. Сайлымаш уто-сите деч посна эрта манын ӱшанем, – пеҥгыдын мане Йошкар-Оласе Ветеран-влак ушемын председательже Геннадий Мустаев.
Маргарита ИВАНОВА
Авторын фотожо
