Марий Элым вуйлатыше мӱшкыран студентке-шамычлан 100 тӱжем теҥге дене тӱлаш пунчалым луктын.
Юрий Зайцев ӱдырамаш консультацийын учётышкыжо шогалше мӱшкыран студентке-влаклан 100 тӱжем теҥге кугытан ик гана тӱлыман выплатым пуымо нерген пунчалышке кидпалым пыштен.
У выплате самырык ава-влаклан полшымашке, виктаралтын. Тудо йоча шочмо чотым кугемдыме шотышто регионысо программын, тыгак Россий Федераций президент Владимир Путинын тӱҥалтышыж почеш илышыш пурталтше «Еш» национальный проектын ужашыжлан шотлалтеш.
«Еш – тиде обществын негызше, да ме, самырык ава-влак полшымым шижышт манын, чыла ыштена», – палемда Юрий Зайцев.
У правил-влак дене келшышын, ик гана ойыралтше оксам профессиональный але кӱшыл шинчымашым очный формо дене налше студентке-шамычлан тӱлат. Выплатым академический отпускышто улшо-влакат налаш праван улыт.
Палемдыме оксам налшашлан студентке-шамычлан ӱдырамаш консультацийын учётышкыжо мӱшкыран улмо 12 арня гыч куд тылзе марте шогалаш кӱлеш.
Тымарте тыгай выплатым азам ыштыме деч вара веле тӱленыт.
Документым Кугыжаныш да муниципал услуго портал, республикысе чыла МФЦ гоч, илыме верысе Калыклан социально полшымо мере-влакым ыштыме рӱдерыште лично пуаш лиеш.
Ӱшаныме шуэш, у выплате мӱшкыран студентке-влаклан тунемме жапыштак ава лияш ямдылалташ полшымыж дене демографий сӱретым саемдымаште кӱлешан ошкыл лиеш.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
