Кодшо шуматкечын Йошкар-Олаште, Изи Какшан эҥер сер пеленысе Тумер отышто «Чарла кол шӱр» фестиваль кумшо гана эртен.
Поро йӱлаш савырныше пайремын эн оҥай ужашыже – район ден ола муниципалитетла гыч толшо команде-влакын кол шӱрым шолтымышт. А командышкыже тӱҥ шотышто боевой действийын ветеранже, нунын лишыл еҥышт ушнат. Фестивальын организаторжо «Чарла хутор» казак обществе тудым икымше гана тыгай шонымаш денак эртарен: СВО ветеран ден участник-влакын ешыштлан пырля погынен каналташ йӧным пуаш.
Тенийысе фестивальым Марий Эл правительстве полшымо дене Марий Элын Тӱвыра, савыктыш да калык-влакын пашашт шотышто, Спорт министерстве-влак, Йошкар-Ола администраций, «Единый Россий» партийын регионысо пӧлкаже, «Шочмо элым аралыше-влак» фонд, «Боевое братство» организаций да Военно-исторический обществын республикысе пӧлкаже иквереш эртареныт.
Тудым ынде «Чарла хутор» обществын визитный картычкыже манашат лиеш. Казак-шамыч тунар шукын уке улыт гынат, пашашт коеш. Мутлан, Йошкар-Олаште гына 32-шо № школ пелен кум казак кадет классым почмо. СВО-што служитлыше казак-шамычат улыт. Марий Эл правительстве председательын икымше алмаштышыже – тӱвыра, савыктыш да калык-влакын пашашт шотышто министр Константин Иванов чолга казак-влаклан министерствын Чап грамотыж ден Тауштымашыжым кучыктен. А Российысе Военно-исторический обществын регионысо пӧлкажым вуйлатыше Евгений Кузьмин ден «Чарла хутор» казак обществын атаманже Евгений Пушкин ваш келшен пашам ыштыме нерген ойпидышым пеҥгыдемденыт.
Ты фестиваль кочкыш да поро кумылым ончыктымо пайрем веле огыл, вет казачествын тӱвыраже эше тӱрлӧ йӱлалан поян. Тудо Шочмо эллан да юмылан ӱшанле улмо умылымашеш негызлалтеш. Кол шӱрым шолтымо жапыште Тумер кумдыкышто нине йӱла-влак дене палдареныт. Имнешке-шамыч имньыштым вӱден коштыныт, умдым кышкен, пикш дене лӱйкален, моло куралым кидыш налын ончаш йӧн лийын. Сценыште усталык коллектив, посна мурызо-влак куандареныт, эсогыл Моско, Самара, Саранск олала гыч толыныт.
Кол шӱр конкурсыш ушнышо-влак уна-шамычлан поян манашат лиеш ӱстелым погеныт. Мутлан, Кужэҥер кундем гыч толшо-влак эсогыл марий шергомкогыльым, шӱрашан мелнам, мола калык чесым ямдылен конденыт. Шере йӱшыжым эсогыл вич тӱрлым шолтеныт: емыж-саскам, шудым кучылтыныт. Юрино командын ӱстембалжым пеш моторын кӱктымӧ кол чес сӧрастарен.
Кол шӱрым кажныже шке рецептше дене ямдылен. Юлсер команде шӱрым Юлышто кучымо шийгол, стерлядь, ловал, берж гыч шолтен. Южышт эсогыл лу наре тӱрлӧ колымат кучылтыныт гын, а ала-кӧжӧ тушко агытан шылым ешарен.
Команде-влак жюрим да уна-влакым сийлымеке, шӱрышт нерген каласкаленыт. Кажне командын капитанже лийын. Мутлан, Волжский районыным СВО-н ветеранже, администраций вуйлатышын алмаштышыже Альфред Нурмухаметов вуйлатен, Кужэҥер округ гыч «Ошманьюго кугыжа да тудын свитыже» командым – Шочмо элым аралыше-влакын ешыштын комитетыштым вуйлатыше Клавдия Никитина. Тудын ик чолга участницыже Ольга Иванова СВО-што вуйым пыштыше Сергей пелашыжын Геннадий ачаже да шке ачаже Вячеслав Пушкарёв дене пырля толын ыле. Тыге еш дене тӱшкан толшо-влак моло командыштат лийыныт.
Ты фестиваль томжо лач тыште: тушко ушнышо-влакын икоян улмышт. Нуно чыланат икте-весылан эҥертыш улыт. Шукыштын пелашышт, шочшышт, уныкашт СВО-што вуйым пыштеныт, сандене вашла сайын умылат, полшаш ямде улыт. СВО-што улшо рвезе-шамычлан гуманитар полшымат пырляк чумырат. Жапын-жапын вашлиялтыт, могай эше сай пашам ышташ лийме нерген шонат.
Фестиваль шке кӱлешлыкшым пеҥгыдемденак толеш. Российысе калык-влакын икоян улмо идалыкыште тудат пеленна илыше вес калыкын тӱвыражым утларак пален налаш, самырык-влакым шочмо элым йӧратыме шӱлышеш шуараш полша.
Светлана Носова
Светлана Носован фотожо.
