Российысе сӱретче-влакын ушемыштын еҥже, Марий Элын сулло сӱретчыже да кугыжаныш кӱкшытан ятыр премийын лауреатше Сергей Алдушкинлан – 55 ий.
Тудо 1967 ий 5 августышто Курыкмарий район Латансола ялыште шочын да кызытат туштак ила. Самырыкше годым Йошкар-Оласе художественный училищыште, 1996 ийыште Москвасе И.Суриков лӱмеш кугыжаныш художественный институтын станковый живопись факультетшым тунем лектын, Францийыште стажировкышто лийын. 2 сентябрьыште Йошкар-Оласе Гоголь уремыште верланыше Изосымыктыш тоштерыште «Сергей Алдушкин – Усталык корно» лӱман ончерже почылтын.С.Алдушкин тыгай выставкым вич ийлан ик гана ышта. Кок залыште вераҥдыме пашаже-шамычым (чылаже 300 радына) ончымо годым шижалтеш: тудо калыкым чын ончыкта, кажныштыже ала-мом да уым пурта. Акварельыште – пӱртӱс, ава-ача, шочмо кундемысе ял калык, лишыл йолташ-влак, Галина пелашыже, Юл эҥер, кумдан палыме еҥ-влак, Латансолан мотор уремже… Радынаш велыме ялысе сюжет, тошто арвер-шамыч марий калыкын илыш радамжым рашрак ончыкташ, умылаш полшат. Ончерыш толшо еҥ пуйто ик татлан эн пиалан пагытыш – йоча годсо жапыш – пӧртылеш. Ачаже Сергей Степанович сӱретлаш йӧратен, сандене изак-шоляк Вениамин ден Сергейымат ты пашалан шӱмаҥден. Садланак ончерыште нунын пашаже-шамыч денат палдарыме. Тыгак Валентин эргыжынат радынажым ужаш да акым пуаш лиеш.
Ончерым почмаште Курыкмарий кундем гыч Василий Черновын «Эхо» ансамбльже, кӱслезе-влак семышт кумылым нӧлтеныт, шкешотан шижмашым шочыктеныт.
«Курыкмарий мландын эн шергакан брендше-влак – кӱсле, кравец. Мый тиде радамыш Сергей Алдушкиным ешарынем: тудо – калыкнан чонжо, шкешотан брендна», – кугешнен каласыш Курыкмарий районысо администрацийым вуйлатыше Наталья Арганякова.
Республикын тӱвыра, савыктыш да калык-влакын пашашт шотышто министрын алмаштышыже Елена Бурнашева тыге палемден: «Сергей Сергеевич – тӱнямбал кӱкшытан сӱретче. Акварельже шкешотан. Пӱртӱсымат, верысе айдемымат чын тӱс дене ончыкта. Шочмо Латансолаштыже галерей ден тоштерым почын. Сергей чыла тошто арверым пога, арала».
Варажымат уста сӱретче лӱмеш шуко поро мут, саламлымаш-влак йоҥгеныт. Ончерыш Угарман, Моско гыч уна-влак толыныт. Угарманысе Варнавинский районым вуйлатыше Сергей Смирнов Алдушкинлан «Преподобный Варнава Ветлужский» юмоҥам пӧлеклыш. Россий Федерацийын сулло сӱретчыже Иван Ямбердов шке сӱретшым пӧлеклен каласыш: «Сергей – пашаче айдеме, кутко да мӱкш гай тырша. Шарнем, тудын дене пырля Сербийыште от «А до Я» ончерым ыштенна. Тудо марий мландынам ончыкташак шочын». Марий Эл искусствын сулло пашаеҥже, М.Шкетан драме театрын художественный вуйлатышыже, Василий Пектеев тыге мане:
«Ӧрыктарыше, куандарыше ончер! Сергейым ятыр ий палем. Иктым палемдем: тудо – марий калыкын «бриллиантше»! Тӱнямбал кӱкшытан сӱретче. Талантан веле огыл, эше моткоч поро айдеме».
Варажымат уста сӱретче лӱмеш шуко поро мут, саламлымаш-влак йоҥгеныт.
Мучашлан Сергей Сергеевич шкеже тыге каласыш: «Мый пиалан айдеме улам – йӧратыме пашам ыштем, тыланда кӧра сӱретлем. Курыкмарий велысе калыкым ончыктем да тудын уста Пекунькинмыт ешыжым палемдыме шуэш. Тудо мыланна, творческий айдеме-влаклан, эре полша – тидлан моткоч кугу тау! Мый декем унала мийыза!»
М. СКОБЕЛЕВ
Авторын фотожо
