КУЛЬТУР ДА ИСКУССТВО

Уэмден олмыктымо тӱвыра пӧрт — чапле пӧлек

Кодшо кечылаште Юрино районысо Йӱркына посёлкышто уэмден олмыктымо деч вара верысе тӱвыра пӧртым почыныт, увертара республикын Тӱвыра, савыктыш да калык паша шотышто министертвын пресс-службыжо.

Уэмден олмыктымо паша «Тӱвыра» национальный проект полшымо дене ышталтын. Тиде культур учреждений тусо кундемыште илыше 2 тӱжем наре еҥлан канашышт ик эн сай верлан шотлалтеш.

Тиде оралте 1990 ийыште чоҥалтын да тудын пашам ышташ тӱҥалмыж деч вара капитально олмыктымыжат огыл. Леведыш гыч вӱд йогымылан кӧра, оралте йӧрдымыш савырнен да 2020 ий гыч петыралтын. Тунам тӱшка культур мероприятий-влак школышто, библиотекыште да уремыште эртаралтыныт.

Идалык мучко тыште тӱрлӧ ийготан-шамычлан келшыше 280 наре мероприятий эртаралтеш. Культур пӧрт пелен йоча-влаклан кок кружок да шуко профилян (йоча, самырык да еш) кум клуб пашам ыштат. Клуб пелен ӱдырамаш-влак «Родник души» мурышо ансамбльым чумыреныт. 

Йыркына тӱвыра пӧртым капитально уэмден олмыкташ да леведышыжым вашталташ «Тӱвыра алан» национальный проект полшымо дене федеральный, республикысе да муниципальный бюджет гыч 8 миллионат пеле теҥге ойыралтын.

Субсидийын шукырак ужашыже зданийын леведышыжым вашталташ кучылталтын, а кодшо оксаж дене шокшым пуртымо, зритель залым да фойем олмыктымо, окна ден омсам вашталтыме.

А «Верысе тӱвыра пӧрт» программе полшымо дене тушто музык оборудованийым, сцене вургемым да креслым налыныт.

Тӱвыра пӧртым торжественно почмаште Марий Эл республик вуйлатышын тергыше виктемжым вуйлатышын сомылжым жаплан шуктышо Наталья Лапшина, тӱвыра, савыктыш да калык паша шотышто министрын алмаштышыже Александр Луничкин да молат лийыныт.

— Уэмден олмыктымо тӱвыра пӧртым почмым посёлкышто илыше-влак чыланат куанен вученыт, — палемден А.Луничкин. — «Тӱвыра» нацпроект полшымо дене йоча-влаклан жапым пайдалын эртараш, ешартыш шинчымашым налаш да вияҥаш йӧн лийшаш.

Пайремыште Юрино район администраций вуйлатыше Марина Шихова олмыктымо пашам ыштыше-влаклан тауштымашым кучыктен, а районысо артист ден  культур пӧрт пеленысе усталык коллектив мастарлыкышт дене куандареныт.  

А.БАЙКОВА

Опубликовать в Одноклассники

Добавить комментарий