Йошкар-Оласе 29-ше №-ан школлан Россий Федерацийын Геройжо Дамир Шаймардановын лӱмжым пуымо.
Донецк ден Луганск калык республиклам аралыме годым салтак порысшым шуктышо да ик кредалмаште геройла колышо старший лейтенант лӱмеш шарнымаш оҥам тунемме верыште 1 сентябрьыште торжественный линейке годым почыныт.
Марий Эл Республикым вуйлатышын пашажым жаплан шуктышо Юрий Зайцев Россий Федерацийын Геройжо Дамир Шаймардановын ача-аваже Эдуард Радикович ден Ирина Викторовна, тыгак тений икымше классыш кайыше Эльман шольыжо дене пырля шарнымаш оҥа ончыко пеледышым пыштымыж деч вара каласен: «Россий Федераций президентын куштымашыж почеш таче тыланда кугу наградым – «Шӧртньӧ Шӱдыр» медальым – чон вургыж кучыктем. Шочмо эл, Россий верч вуйым пыштыше герой-влак нерген курымешлан шарнымаш кодеш манын, моткоч ӱшанем. Нуно шке илышыштым мемнан верч пуэыныт: Россий виян лийже да шочмо элна ӱмбаке ик тушманат кидшым ынже нӧлтал манын шоненыт. Тек эргыда нерген волгыдо шарнымаш кодеш».
Россий Федераций Совет председательын алмаштышыже, Марий Эл Республикын кугыжаныш кучемжын исполнительный органже деч еҥ Константин Косачёв палемден: Дамир Шаймардановым шуко тукым шарнен илаш тӱҥалеш.
«Дамирын подвигше нерген каласкалымаште йоҥгалте – тудо атакын эн лӱдыкшӧ верыштыже лийын. Тыге ойлымым колын, мый чылаштымат шоналташ йодам. Ала-кӧ кокымшо кая, ала-кӧ – луымшо, а кӧжӧ – икымше. Мутат уке, икымшыже колат да тидын нерген нуно, очыни, шкежат палат, туге гынат чарнен огыт шогал, вет нуным тыге воспитатлен огытыл. Конешне, ача ден ача эргыштым ончен куштымо годым тудым курымешлан йомдарена манын шонен огытыл, но нуно Дамирым чын корно дене вӱденыт. Лач нунын гайлан кӧра ме илена. Тау, Дамир, тый курымешлан мемнан дене пырля улат», – каласен тудо.
Аважын мутшо почеш, Дамир изинекак военный лияш шонен. «Офицер лиймыж годым тудлан 23 ий лийын. Тудын подчинённыйжо, йолташыже, военнослужащийже-влакын ойлымышт почеш, эргым эре ончылно лийын. Танк дене кудал лектыныт гын, Дамир вуйлатен. Позывнойжо – «Броня». Тидым чылан палышт да шарнышт. Сусыргышо, колышо йолташыже-влакым да молымат шке броняж дене луктедымыжлан тыгай позывнойым пуэныт манын шонем. Тудо шкенжым чаманен огыл, молан манаш гын сусыргышым госпитальыш наҥгаен шукташ шонен, а колышо-шамычым шочмо мланде марте конден шуктышт манын тыршен. Российын Геройжо – тиде чап гына огыл, тидым сулаш кӱлеш. Ача-ава-влаклан тыгай нелытым нумалаш моткоч йӧсӧ, но эргына да моло рвезе-влак ешыштым , шочмо элым, мемнам араленыт. Нуно вуй ӱмбалне тыныс лийже манын шоненыт. Эргына дене ме кугешнена», – каласен Ирина Викторовна.
Дамир дене пырля служитлыше йолташыже старший лейтенант Сергей Яковлевын ойлымыж почеш, тудымат мемнан землякна сусыргышым шке броняж дене луктын.
Школым вуйлатыше Александр Кузнецов палемден: тачысе самырык тукымым туныктымо пашаште элна верч вуйым пыштыше герой-влак нерген шарнымаш моткоч кӱлеш, а Дамир Шаймарданов нерген шарнымаш курымеш лийже манын, школ чылажымат ышташ ямде.
Старший лейтенант Дамир Шаймарданов 2022 ий 30 апрельыште Долгонькое селам утарыме годым кредалмаште россий военнослужащий-влакын колонныштым вуйлатен. Атакыште эн ончылно улмыж годым колен. Россий Обороно министерстве Дамир Шаймардановлан кугу званийым – Россий Федерацийын Геройжо – лӱмым пуэн да «Шӧртньӧ Шӱдыр» особый отличиян знак дене палемден.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
Д.Речкинын фотожо
