Марий Эл Правительстве регионын пожар ваштареш кучедалше службыжым пеҥгыдемдаш резерв фонд гыч 1,5 миллион теҥгем ойырен.
Тидын нерген Марий Эл Республик вуйлатыштын район администраций вуйлатыше да исполнительный кучем орган-влакын еҥышт дене пожар лийын кертме лӱдыкшыдымылык йодышым каҥашыме совещаний годым увертареныт. Тушто Марий Эл деч РФ-н Федераций Советыштыже сенатор Константин Косачеват лийын.
Александр Евстифеев ойлымыж годым поснак май пайрем кечылаште кучемын чыла орган вуйлатышыже-влак деч тӱткырак лияш йодын. Тидын шотыштак муниципалитет вуйлатыше-влаклан Граждан обороно комитет да Россий МЧС-ын Тӱҥ управленийжын пашаеҥже-влак дене пырля калыклан чодыра пожар ылыжме годым шкем кузе кучаш кӱлмӧ шотышто посна памяткым ышташ, тыгак верлаште пожар ваштареш кучедалше районласе комиссий-влакын членыштын спискыштым уэмдаш кӱштен.
29 апрель гыч регионышто пожар ваштареш кучедалме режим пурталтеш, санденак чодыраш пурен-лектын коштмо шотыштат чарак лиеш. Тидын шотыштак республикын Образований да науко министерствыже май пайрем годым тунемше-влакын мом ышташ тӱҥалмышт шотышто посна программым ыштышаш.
Регион вуйлатыше кугу тӱткышым верлаште пожар ваштареш кучедалаш кучылтмо техникылан ойыраш кӱштен. Ты шотышто тергымаш ситыдымашым тӱжваке луктын: южо вере ойпидыш почеш технике уло манын ончыктымо гынат, тудо пашам ок ыште, эсогыл аккумуляторжо уке. Эшежым пытартыш куд ий жапыште технике йӧршеш уэмдалтын огыл. Тачысе кечылан тиде службышто 678 единице технике да 5286 еҥ ыштат.
Резерв фонд гыч ойырымо окса пожар ваштареш кучедалше службым лачшымак технике шотышто уэмдаш кайышаш. Ончыкыжымат тиде йодышлан кугу тӱткыш ойыралташ тӱҥалеш, палемден А.Евстифеев. Ты шотышто тудо сенатор Константин Косачевымат полшаш йодын.
Муниципальный образованийлаште быт да чодыра пожар-влак ылыжме сурет дене Медведево, Килемар, Параньга, Звенигово район администраций вуйлатыше-влак палдареныт. Нуным колышт лекмеке, регион вуйлатыше ты пагытыште кукшо шудым йӱлатымым пеҥгыде контрольыш налаш кӱштен, поснак илыме секторлаште, сад товариществылаште, дачылаште да газ пуч кайыме кумдыклаште тӱткылык лийшаш. Сандене 29 апрель гыч чодыра пожар ылыж кертме кумдыклаште патруль тӱшка-влак дежуритлаш тӱҥалыт. Добровольный пожарный дружине-влакынат пашаштым саемдыман, палемден А.Евстифеев.
Верысе администраций вуйлатыше-влак шке кундемым тор деч эрыктыме, пожар ылыж кертме амалым ончылгоч кораҥден толмо пашам ворандарен колтышаш улыт. Чодыра лишне верланыше илемла воктене минерализироватлыме полоса-шамычым ыштыман. Тыгак верлаште пожарым йӧрташ кучылтмо вӱдым налаш машина нимогай чарак деч посна миен кертшаш.
Республик вуйлатыше регионышто пожар лӱдыкшыдымылык шотышто законодательствын йодмыжым чылашт деч чоткыдын шукташ кӱштен. Тиде амал денак пайрем кечылаште республик правительствын еҥже-шамыч дежуритлаш тӱҥалыт.
С.Носова.
