УВЕР ЙОГЫН ЭКОНОМИКЕ

Тошто гыч – уыш, изи гыч – кугуш

Верысе производство

Тошто гыч – уыш, изи гыч – кугуш

Звенигово район Шолэҥер посёлкысо ты предприятийыште ныл ий ончыч лийынам ыле. Тунам тудо ончычсо совхозын тошто гаражыштыже верланен. Кӧргыжым пужен ыштыме гынат, лапка да шыгыр лийын. А тений миен лекмеке, воктенжак кӱкшӧ у зданийым ужын, ӧрынат колтышым. Тушко кок ий ончыч куснымо улмаш. А индивидуальный предприниматель лӱм дене ыштыше предприятийын «Технологий» ООО-ш савырнымыж нерген пален налмеке, ӧрмем кенета йомо. Кугешнымаш гына ылыже, да тудын директоржо Д.А.СЕРКОВ дене мутым вашталташ кумыл лекте.

– Дмитрий Александрович, Те вет тиде пашам шукертак тӱҥалында?

– Предприниматель пашаш коло ий ончыч ушненам, а ты производствым латшым ий ончыч почынам. Тунам тудо изирак веле ыле. Жапшат неле лийын. Кредитымат кугун пуэн огытыл. Эркын-эркын кушкын толмо. Мебельымат изин-изин да йодмо семын гына ыштыме. Эн ончычак – торгайыме оборудованийым: ӱстелым, витринылык стеллажым… Районышто шуко кевытше мемнан мебель дене почылтын. Тыгак калыклан кухньылык гарнитурым, купе-шкафым ямдыленна.

– А кызыт могай мебельым ыштеда?

– Нинымак, но эше моло тӱрлымат. Мутлан, медучреждений-влаклан. Теве Звенигово район больнице кӱртньӧ оратан да коваште дене ковыжлыман пушкыдо диванлан, лабораторийлык шкафлан заказым ыштен. Ты районысак Красногорский больницылан палатылык мебельым – шкаф ден тумбычкым – шуко колтышна. Тушто у отделенийым почыныт. Психо-неврологий диспансер ден шоҥгыеҥ-влакын пӧртыштланат посна мебель ышталтеш. Але школ-влаклан парт ден пӱкеным, йочасад-влаклан кроватьым, ӱстел ден пӱкеным шагал огыл ямдылена. Да шкенан районысылан веле огыл. Адакше ме чылажымат СанПиН йодмылан келшышым да чытышым ыштена, сандене нуно мемнан мебельлан тунем шуыныт, ынде икмыняр ий почела заказым ыштен шогат.

– Предприятийдан у зданийже кумдыкшо да кӱкшытшӧ дене ӧрыктарыде ыш керт.

– Тудым, шоненак, тыге планироватлыме: производствым кумдаҥдаш кӱлеш лиеш гын, кӧргыштак кокымшо пачашым ыштен кертына. А вер огеш сите гын, ешартыш зданийымат нӧлташ лиеш. Илыш гына сай велыш вашталтше да заказ утларак пурыжо.

– У оборудованийламат ешарынеда?

– Утларак ышташ тӱҥалына гын. Кызытеш улшыштынат куатышт ситат – ме нуным уымак налынна. Форматлан келшышын тура але йыргешкын пӱчкедыше, шӧр гыч тӧрлышӧ да клеитлыше, рожым шӱткалыше – чыла тӱрлӧ станокна уло, да икмыняре, тидын шотыштак числовой программе почеш виктарымат. Санденак мебельнам налше-влак ӧпкелен огыт керт. Ме качествылан ончычсек кугу тӱткышым ойырена. Утларак натуральный материалым кучылтына да у технологийым шыҥдарена.

– Пашаеҥда-влак ситышын улыт?

– Мебельым ыштыше-влак кызытеш ситат, нуно ончычсек тыште тыршат. А молышт, мутлан, транспортник-влак, ешаралтыт. Ончыч нуно мебельым да тудлан материалым гына шупшыктеныт гын, ынде моло тӱрлӧ грузымат, мутлан, кочкыш продуктым, заказ почеш кондыштарат. Ончыч легковой автомобиль ден тыглай грузовой газель-влак гына лийыныт гын, ынде термос шотан фургон-влакат улыт, лач нунын дене продуктым шупшыктена. Сандене транспорт дене шупшыктымаш бизнесын посна видышкыже савырнен. Йодмаш уло гын, тудым умбакыже шарен толаш шонена. Сандене ты шотыштат кушкына. Да тиде кок направленийге пашанам «Технологий» ООО ушен шога.

– Шкендан илышыштат вашталтыш лийын докан?

– Мый бизнеслан пижме деч ончыч Марий радиомеханический техникумым тунем пытаренам, технический образованийым налынам да тидын негызешак производствым тӱҥалынам. Тылеч вара Юл кундем кугыжаныш технологий университетыште экономике дене бакалавриатым тунем лектынам. Ынде экономике денак да туштак магистратурышто шинчымашым пойдарем. Тений иктешлыше диссертацийым аралаш тӱҥалам.

– Те вет район погынымашын депутатшат лийында?

– Да, кодшо кудымшо созывышто. Шымше созывыш шым кай. Весыш шке кандидатурем пуаш шонем. Кызытеш изиш каналтем. Вет депутат паша шагал огыл жапым налеш, а тудо пытартыш ийлаште мыйын шагал ыле. Сандене ончыкылан ӱшанаш гына кодеш. Бизнесымат вияҥден толман. Тыге гына кушкаш лиеш.

– Меат Тыланда тидымак тыланена.

– Тау!

Юрий ИСАКОВ

Снимкылаште: директор Д.Серков; мебельым погышо И.Степанов; мебельлан пӱчкедыше А.Коротков; предприятийын у корпусшо; медицинылык мебель.

Авторын фотожо

Опубликовать в Одноклассники

Добавить комментарий