Фотолаштык
Михаил СКОБЕЛЕВ,Лидия ШАБДАРОВА
«Тора кундемла гыч пӧртылмеке » …
13 мартыште Йошкар-Олаште Т.Евсеев лӱмеш национальный тоштерыште фотограф, самодеятельный художник, путешественник Лев Киндуловын авторский выставкыже почылтын. Тушто сӱретчын фотографийже ден радынаже-влакым чумырымо.
Лев Николаевич 1969 ий 29 апрельыште Шернур район Кукнур селаште шочын. Ачаже – врач-педиатр, Марий Элын сулло врачше. Аваже – руш йылмым да литературым туныктышо, МАССР-ын сулло туныктышыжо. Лев Шернур посёлкысо 1-ше №-ан школым тунемын пытарымек, Дальний Востокышто служитлен. 1989 гыч 1995 ий марте Рязаньысе медицине университетыште тунемын. Вуз деч вара Волжск оласе рӱдӧ эмлымверыште врач-анастезиолог-реаниматологлан пашам ыштен. Фотографын пелашыжат – врач, акушер-гинеколог, эргышт – программист, а ӱдырышт педагоглан тунемеш.
Кызыт пӧръеҥ анестезиологий пӧлкам вуйлата. Школышто тунеммыж годым дельтапланеризмлан шӱмаҥын. Тыгак вӱд йымалне ийын кошташ йӧрата, тушто южгунам сонарла. Пытартыш жапыште кайт дене (юж кишке) коштеш, спортын моло видше денат заниматла.
Выставкым почмо годым автор путешественник лиймыж нерген каласкален. тудлан пример семын ача-аваже лийыныт. Нуно 13 утла элыште лийыныт. Лев Волжск олам ончаш мийыше-шамычлан полыш кидым эре шуялта. Шке путешествийже-влакым пӧръеҥ видеош, фотоаппаратыш войза. Тора кундемыш кайымыж годым Киндулов пеленже мардежым ӱжшӧ алтайысе шаманын пӧлеклыме бубенжым налеш. Мо оҥайже, тиде шаман шкеже шочынжо Шернур кундем гыч.
Шукерте огыл Лев Киндулов радынам сӱретлаш тӱҥалын. Выставкыш погынышо-влаклан тудо пытартыш путешествийлаж нерген каласкален, видеофильмым ончыктен. Сӱретче вес кундемым гына огыл, тыгак Марий Элысе оҥай верламат пашалаштыже ончыкта. Тудын фотолаж ден видеоштожо Турцийын курыкысо пейзажшым, Критын моторлыкшым, Венесуэлысе Маргарита отросо игуане-влакым, Занзибар отросо черепахым, Кубысо Свобода отрон, Таиландын, Африкысе эллан сӧрал кундемыштым ужаш лиеш.
Теве тыгай ойыртемалтше еҥ мемнан коклаште ила. Тыгодым тудо суксо семын черле-влакым колымаш деч утара, путешествийла гыч пӧртылын шке поро вийже ден весе-шамыч дене пайлалтеш, ятыр оҥайым каласкала.
Михаил Скобелевын фотожо.
