Марий Элыште «Школа утилизации: электроника» федеральный экологический поро кумыл программе илышыш пурталтеш.
Тудын кышкарыштыже кугыжаныш ден муниципальный кучем орган, бюджет тӧнеж-влак йӧрдымыш савырныше оборудованийыштым оксам тӱлыде утилизироватлаш праван улыт.
Программыште коммерческий организаций-шамычат участвоватлен кертыт, но нунын 1 кубометр электрон да электрический оборудованийыштым утилизироватлымылан 1 ырым налыт.
Утилизацийым пӱртӱсым аралыме законодательствын нормыжо-влакым шотыш налын ыштат.
Программын кышкарыштыже Пӱртӱс дене пайдаланыме фонд оборудованийын технический состоянийжым чылт яра терга да списатлыме техникылан актым ышта.
Утилизацийыш пайдаланаш йӧрдымӧ компьютер, электрон, электрический, оптический, быт оборудованийым, электроӱзгарым, станокым, науко да медицине техникым, телефоным, персональный гаджетым, шапаш ужаш ден аксессуарым, картриджым налыт.
Программыш ушнаш шонышо-влак фондын сайтыштыже (https://eko-fond.ru/electronics/#register) регистрироватлалтшаш улыт.
Программым эртарыме деч вара эн чолга да экологийым аралыше организаций-влакын рейтингыштым ыштат, нунылан шергакан пӧлек ден ведомствын наградыжым кучыктат.
Иктаж умылыдымаш але йодыш лекме годым программын координаторжо Андрей Петрович Толочколан 8 (903) 232-67-64 номеран телефон дене йыҥгырташ але rme@eko-fond.ru электрон адресышкыже возаш лиеш.
М.ИВАНОВА
Фотом интернет гыч налме
