С.Г.Чавайн лӱмеш национальный книгагудышто латкокымшо гана «Марий Элыште йырым-йырысе средан кызыт могай улмыжо да калыкнан тазалыкше» шанче-практик конференций эртен.
Ты мероприятий книгагудышто кажне ийын эртаралтеш. Еш идалыкыште экологий форумышто кугу вер тыгак ешланак ойыралтын.
Конференцийыште 10 доклад йоҥгалтын. Нунын авторышт эколог, биолог, эпидемиолог, специалист-эксперт, тыгак медик психолог, ешартыш шинчымашым пуышо туныктышо, воспитатель, волонтер-влак лийыныт.
Йошкар-Олан ик кумдыкыштыжо – «Интеграл» микрорайонышто южын лавыран улмо, пӱнчер отышто ир кайык-влакын колымышт нерген доклад-влак оҥай лийыныт.
Калыкын тазалыкшым пеҥгыдемдаш полшышо «Кичиер» санаторий директор Надежда Савинан докладше гоч шуко уым пален налаш йӧн лийын. Тыште теве мом палемденак кодыман, кызыт республикысе санаторийлаште эмлаш кучылтмо лавырам эсогыл Свердловск кундем гыч кондат улмаш. А шкенанжын сертификаций жапше лектын.
Роспотребнадзор управленийын специалистше-влак химий препарат-влак дене аяргыме нерген каласкаленыт. Республикыште экологий туризмат сайын вияҥеш. Еш дене пӱртӱсыш лектын каналтыме йӧным шукын кучылтыт, вет тидлан мемнан дене чыла уло, пӱртӱснат куандара. Эшежым тыгай каныш шергыш ок шу.
Республикын пӱртӱс поянлык, экологий да йырым-йырысе средам аралыме шотышто министр Алексей Киселев икшыве-влакым пӱртӱсым аралаш туныктен толмо паша дене палдарен.
Конференцийым иктешлыме годым, участник-влак икоян лийыныт: республикыште социально-экологический благополучий лийже манын, эн ончыч таза илыш йӱлам кучыман, ешыште умылымаш, пагалымаш лийшаш, йырым- йырысе средамат араленак толман.
Конференцийым эртарыше-влак экологий, таза илыш йӱла дене кылдалтше тематический книга ончерым ямдыленыт ыле.
Светлана Носова
Снимкыште: конференций годым
Авторын фотожо
