ТАЧЕ ЯЛЫШТЕ

«Телым йÿштат, поранат лийшаш»

Тенийысе теле моткочак йомартле: игечат утыжым ны йÿштö, ны леве огыл, лумат ситышын…

Поснак пытартыш кечылаште лум луммылан, поран ÿштмылан кöра республикнан южо ялышкыже автомобиль корно йöршын гаяк петырнен. Тидыжым Волжский районысо Курыклÿвал ялыш наҥгайыше корно шотыштат ойлаш лиеш ыле, но таче, 8 февральыште, лумым МТЗ-80 трактор дене шÿкеныт. Ынде тышке тичмаш приводан машина дене лÿдде пураш лиеш. Спецтехникыланат чарак уке.

Поран Сотнур ял шотан илем администрацийлан веле огыл, калыкланат пашам ешарен. Кÿжгын вочшо лум оралте леведышым темда, сандене тудым, пеҥгыдемын нелеммешкыже, ÿлыкö кышкаш кÿлеш, а кудывечыш погынышыжым – пакчашке але уремыш лукташ.

– Южо верыште лум ик метр кÿкшыт возын. Пытартыш жапыште ме веле огыл, пошкудо-шамычат тиде пашамак веле ыштена: лумым оралте ÿмбач кышкена, кудывече гыч уремыш шупшыктена, – каласкала Курыклÿвалне илыше Лариса Сергеева. – Йöра, Михаил эргым Волжск ола гыч кажне каныш кечыжлан толеш. Тудо леведышыш погынышо лумым я пакчашке, я кудывечышке кышка, мый, пластик волыш оптен, уремыш луктам. Южгунамже модын шогылтмыла веле чучеш: эрдене тÿгö лектат, а лумым пуйто тÿкымат огыл – йÿдвошт эшеат шуко возын.

Туге гынат, Л.Сергеева телылан вуйым огеш ший.

– Телым йÿштат, поранат лийшаш. Ондак, мутлан, шочмо Руш Шайра ялыштем лум пöрт вуй марте шында ыле. Южо ийынже эсогыл капка ÿмбач кошташ логалын. Кызыт тыгай сÿретым нигуштат от уж, – манеш Л.Сергеева. –  Тöшак семын вочшо лум саскан кушкылым кылмыме деч арала, а шошым мландылан могай-гынат вÿд шапашым ышта… Вÿд деч посна гаяк кодшо Мÿшыл ерналанат тудо моткоч кÿлеш…

М.ИВАНОВА

Л.Сергееван фотожо

Опубликовать в Одноклассники

Добавить комментарий