26 майыште республикысе профессионал образованийым пуышо организацийлаште пашам ыштыше самырык педагог-влакын «Зелёная фиеста» XVII фестивальышт лийын.
Тений тудо Туныктышын да наставникын идалыкыштлан, тыгак К.Ушинскийын шочмыжлан 200 ий, Оршанкысе И.К.Глушков лӱмеш шуко профилян колледжым почмылан 60 ий теммылан пӧлеклалтын.
Фестивальыште республикын техникум ден колледжла гыч 11 команде моштымашым ончыктен. Самырык педагог-влаклан поро тыланымашым Марий Эл Образований да науко министр Лариса Ревуцкая каласен:
«Фестиваль самырык педагог ден опытан наставник-влакым иктеш чумырен. Пашам ышташ тӱҥалшылан икымше ошкылым ыштымыж годым да варажат полыш кидым шуялтыме – моткочак кӱлеш. Тидын деч посна самырык специалист сеҥымашыш ок шу да паша кумылжат ок лий. Санденак наставник примерым ончыктышаш, опытшо дене палдарышаш да вияҥаш полшышаш. Ӱшанем, фестиваль нунын коклаште вашкылым эшеат пеҥгыдемда».
Ты гана сеҥышыш лектыныт: Надежда Александрова (Йошкар-Оласе технологий колледж), Татьяна Кузнецова (Оршанкысе И.К.Глушков лӱмеш шуко профилян колледж), Валентина Дубинина, Елена Осокина (Йошкар-Оласе строительный колледж), Игорь Коноплёв (Марий чодыра озанлык техникум).
Г.Кожевникова
Фотом Марий Эл Образований да науко министерствын сайтше гыч налме
