24 апрельыште Звенигово район Чакмарий селаште верланыше Транспортно-энергетический техникум 50 ияш лӱмгечыжым палемда.
1976 ийыште Чакмарийыште 13-шо №-ан ялозанлык профессиональный технический училище почылтын. Икымше директоржо Николай Андреев лийын. Тунам тушто тракторист ден механизатор-влакым ямдыленыт.
1978 ийыште училищым Александр Ураков вуйлаташ тӱҥалын. Тунемме озанлык кумдаҥын, профессий-влак ешаралтыныт, самырык специалист-влаклан кумылаҥдыме полыш вияҥын.
1980 ийыште училищылан «Марий комсомоллан 60 ий» почётан званийым пуэныт: шке жапыштыже тыште пеш виян комсомол организаций лийын.
2004 ийыште тунемме верыш Красногорскысо 14-ше №-ан профучилищым ушымо.
2009 ийыште училище «Транспортно-энергетический техникум» лийын. 2011 ийыште тушко 7-ше №-ан профессиональный лицейым ушымо.
Жап эртыме семын тунемме верын материально-технический базыже уэмдалт вияҥын, туныктышо коллектив профессионал могырым кушкын, самырык специалист-влакым ямдылыме кӱкшыт кугемын. 2016 ий гыч техникум профессионал мастарлык дене республик кӱкшытан чемпионатын «Электромонтаж», «Электромонтаж-юниор-влак» компетенцийже-влак дене площадкылан шотлалтеш.
2024 ий гыч техникумын директоржо – Владимир Данилов.
Г.Кожевникова
Фотом Транспортно-энергетический техникумын соцкылысе лаштыкше гыч налме
