Украинысе специальный военный операцийыште Морко район гычат чолга да патыр эрге-влак ятырын улыт.
Нунын икшывыштат йоча пагытыштым моло семын веселан да шарнаш кодшын эртарышт манын, Йошкар-Олаште Морко вел ушем (вуйлатыше Валерий Андреев) республикнан рӱдолашкыже конден. Тидлан автобусым район администраций ойырен.
Пайрем шӱлышан ты вашлиймаш Йочам аралыме тӱнямбал кечылан пӧлеклалтын.
Нуным эн ончычак Марий Эл Кугыжаныш Погын председательын алмаштышыже Лариса Яковлева, депутат Наталья Пушкина саламленыт. Йоча-влак М.Шкетан лӱмеш Марий национальный драме театрыште «Волшебная лампа Аладдина» йомакым онченыт.
Кечывал кочкышым ыштымеке («Фарб-М» ООО полшен, вуйлатыше Алексей Ильин) йоча-шамыч мотор Йошкар-Оланам троллейбус («Троллейбусный транспорт» муниципал предприятий ойырен, вуйлатыше Сергей Деряев) дене ончен савырненыт. Йошкар-Олан историй тоштержын экскурсоводшо Ирина Юдинан олана нерген каласкалымыже нунылан моткоч пайдале лийын. А Тӱвыра да каныме рӱдӧ паркыште (вуйлатыше Иван Конышев) йоча-влак уэш йомак тӱняш логалыныт. Тушто нуно тӱрлӧ модыш дене модыныт, аттракционышто кумылым нӧлтеныт. Тиддеч вара шокшо игечыште юалге мороженый («Йошкар-Оласе хладокомбинат» ООО, вуйлатыше Ольга Сурдина) лачеш лийын.
Пайрем деч вара Морко вел ушемын да М.Шкетан лӱмеш театрын еҥже-влак унала толшо-шамычым тутло олма когыльо да шокшо чай дене сийленыт.
Икманаш, тӱняште каен шогышо событий нерген кушкын толшо тукым палышаш, но йоча пагытыштым нуно веселан да пайдалын эртарышаш улыт. Тек кажне икшыве мланде ӱмбалне пиалым шижын да элнан патриотшо семын виян да чолга лийын кушкеш!
А.БАЙКОВА
Фотом Морко вел ушемын альбомжо гыч налме
