Изиж годым тиде ӱдыр эн ончычак аважын ончыктымыж почеш тӱрлаш тунемын. А вара школышто труд урокышто тудлан тӱрлымат ыштылаш келшен. Марлан лекмекше да йочан лиймекше, кидпашалан утыр шӱмаҥын. Тунам пӱтынь гаяк яра жапшым лач тиде сомыллан пӧлеклен. Тачысе кечылан тудо мом да могайым гына ыштен огыл?!
Тиде кӧ тыгай? Кушеч тудо? Чыла тидым да эше ятыр молым Кужэҥер район Старсела гыч самырык кидмастар Марина Гаптрахманова ышта.
– Икымше пашам скраббукинг йӧн дене ыштенам. Вес семынже тиде кагаз гыч манмым ончыкта. Тыгайым ямдылаш лиймым интернетыште ужынам, да мылам моткочак келшен. Сандене тӧчен ончаш кумылем лектын. Тыге тӱҥалтыште икмыняр тӱрлӧ фотоальбомым ыштенам. Адакшым нуным мый рвезылан да ӱдырлан посна келыштарем. Икшыве шочмеке, кузе кушмыжым, могай лиймыжым – икманаш, тудын нерген возаш да фотографий-влакым вераҥдаш лӱмынак «Мамины заметки» манмым ямдылем, – палыме лиймеке, кумылын каласкалыш кидмастар.
Тылеч вара Марина паспортлан обложкым ышташ тӱҥалын. Тудым ковыжлаш эсогыл итальян материалым кучылтеш. Тыгак иктаж-мом вигак сералташ кид йымалне блокнот ден ручка лийышт манын, магнит-шамычым ыштеда. Нуным, мутлан, кухньышто холодильникыш пижыкташ пеш йӧнан. Моткочак кӱлешан кидпаша.
А вара самырык ӱдырамаш модышым пидаш кумылаҥын. Нуным турецкий шӱртӧ гыч пидеш. Тудыжым лӱмынак интернет гоч налеш. Пытартыш жапыште гын плюшевый шӱртӧ гыч пидаш йӧраташ тӱҥалын. Молан? Шкенжын рашемдымыж почеш, тудо кӱжгӧ, да кеч-момат писынрак пидаш лиеш. Адакшым тыгай модышыжо могай пушкыдо! Теве мый кучен ончышым гын, мӧҥгеш пыштымемат ыш шу. Сандене йочалан тыгайышт поснак келшат. Ойлымыж почеш, икшыве-шамыч кокла гыч рвезе-влаклан гын утларакше модыш мераҥ келша, а ӱдыр-влак ачаштлан але аваштлан единорог ден брелокым утларак кумылын налыктат. Да, мутат уке, курчакым. Нуныжым Марина тыглай гына огеш пид, а эше тугайым ышта – вургемыштым кудашаш, весым чикташ, ӱпыштым шераш лиеш. Ончыкыжым кидмастар эшеат кугу курчак-шамычым пидаш шона. Тидлан амалым, очыни, изиж годым моткочак чапланыше Барби курчак дене модмыжат ыштен. Вет тунам шкежак тудлан вургемымат ургаш тыршен.
Ача-ава-шамыч кокла гыч гын южышт вес шонымашанрак улыт. Нуно, икшывыштын моторикыштым вияҥдаш манын, вичкыж шӱртӧ дене пидме модышым налын пуаш тыршат.
Маринан эргыжат изиж годым тудын пидме тӱрлӧ модышыж денак модын. Да рвезе гынат, аважым ончен, тӱҥалтыште тудат кидпашалан мыняр-гынат шӱман лийын. Поснак шер гыч ыштылаш келшен. Но кушмыж семын тыгай кумылжо пытен.
– Ӱдыр лиеш гын, кидпашалан утларак шӱман лиеш ыле докан, – палемдыш ава.
Тыгак кидмастар изолон гыч тӱрлӧ пеледыш аршаш сынан светильникым ышта. Мыйын тыгай уло, но эше лиеш гын, моткоч куанем ыле! Могай ӱдырамаш пеледышым ок йӧрате?!
А такшым мом да могайым ыштышашым тудо кузе ойырен налеш?
– Иктаж-мо келша гын, нуным ышташ мый шукыж годым интернетыште улшо яра, тыгак тӱлыман мастер-класслаштат лӱмынак тунемам. Соцкылласе тӱрлӧ лаштык ден сайтлаштат ончем, а вара лач тугак ыштем але шке гыч мом-гынат ешарем, але вашталтышым пуртем, – палдарыш тудо.
Ямде пашаже-влакым Марина тӱрлӧ мероприятийлаште ужала. Санденак Йошкар-Олашкат шуэн огыл толеда. Кеҥежым гын поснак чӱчкыдын лиеда. Теве меат тиде кидмастар дене мероприятийыштак – Кужэҥер район Старсела тӱвыра пӧртыштӧ эртаралтше Коҥга пазар пайремыште – палыме лийынна. А тудын мом да могайым ыштымыжым пален, шукынжо ынде шкешт тидым я тудым ямдылен пуаш йодыт.
– Жапем улмо годым изирак модышым ик кечыште пидын шуктен кертам. Вичкыж шӱртӧ гыч курчакым ямдылаш арня наре кая. Молан манаш гын тудо эркынрак пидалтеш, – палдарыш кидмастар.
Мутланымашна мучаште Марина тыге мане:
– Модыш-влакым мый кӱлеш да огыл пидаш шинчам. Кунам кумылем лектеш, тунам кидпашам кучем. Адакшым тидым нӧлталтше кумылан улмем годым ышташ тыршем. Тунам нунат йывыртыше чуриян, весела ончалтышан лийыт. Кеч такшым икгай модышымак икмынярым ыштет гынат, нуно чыланат икте- весышт деч мо дене гынат ойыртемалтше лектыт.
Тыгак палемден кодыш:
– Але марте модышым ятыр пидынам гынат, поснак чот келшыше але эн чот йӧратыме ик кидпашамымат ойырен каласен ом керт. Тыгай модышем уке, молан манаш гын мый кажныштымат йӧратем. Санденак ужалымем годым нунын дене чеверласаш чаманымемла чучеш. Тыгодымак тудо налше йочан кумылжым нӧлталеш, модышем дене модын, икшыве йывырта манын шонем.
Любовь Камалетдинова
Фотом еш альбом гыч налме
