УВЕР ЙОГЫН

Декабрьыште илаш пурат

«Демографий» национальный проектын «Кугурак тукым» федеральный проектше кышкарыште 2019 ийыште Красностекловарский психоневрологический интернатыште 100 еҥлан палемдалтше илыме корпусым чоҥаш тӱҥалме. Тиде пашалан пырля финансироватлыме йӧн дене чылаже 51 млн. теҥгем ойырымо, тышечын 50 млн. теҥгежым – федеральный бюджет гыч, 1,02 млн. теҥгежым – Марий Эл Республикын бюджетже гыч.

Таче кечылан чоҥымо пашан икымше этапшым мучашлыме: зданийым нӧлтымӧ да леведыш йымак пуртымо, окнам шындыме, тӱжвалне инженер сетьым шупшмо. Ойырымо оксам тичмашнек кучылтмо.

Корпусым тений чоҥен шукташ да тушко инвалид-влакым декабрьыште илаш пурташ палемдыме. Кызытеш зданий кӧргым олмыкташ, инженер сетьым шупшаш, оборудованийым шындаш кодын. Тидланже федеральный бюджетын Марий Элын бюджетшылан субсидийым ойырымо шотышто келшымашым ыштыме.

Кодшо пашалан чылаже 37720,50 тӱжем теҥгем ойырымо, тышечын 37343,30 тӱжем теҥгежым – федеральный бюджет гыч, 377,20 теҥгежым – республикын бюджетше гыч.

М.ИВАНОВА

Опубликовать в Одноклассники

Добавить комментарий