Йошкар-Ола гыч самырык актёр Игорь Царегордцев «Комбинация» Российысе сериалыште верысе авторитет Шубан рольжым модын.
Фильмже кодшо курымын индешлымше ийлаштыже кумдан чапланыше «Комбинация» эстраде группылан пӧлеклалтын.
Каласен кодыман, тиде – актёрын икымше кинорольжо огыл. Але марте тудо тыгак «Огонь» (тӱҥ роль), «Водоворот» (2020), «Афера», «Пара из будущего», «Ле.Ген.Да» (2021), «По колено», «Сама виновата?» (2023) фильмлаште модын.
Игорь тений 30 ийым темен. 2014 ийыште ВГИК-ын студентше Игорь Ясуловичын мастерскойыштыжо усталыкшым шуарен. Дипломым налмеке, вигак тудым кок вере пашаш ӱжыныт: Москосо ТЮЗ-ыш да «Совеременник» театрыш. Артист кокымшыжым ойырен налын. Театрыште ыштыме коклаштак тудым киношкат ӱжаш тӱҥалыныт.
Снимкыште: И.Царегородцев.
Фотом «Современник» театрын сайтше гыч налме.
Светлана Носова
