Э.Сапаев лӱмеш опер да балет академический театрын самырык артистше Александр ЧИМАЕВ «Молодые дарования России» конкурсышто сеҥышыш лектын.
Александр Параньга район Ондропсола ялын шочшыжо. Изинекак тудо усталык шӱлышан кушкын, кушташ йӧратен. Верысе школышто нылымше классым тунем пытарымеке, Национальный президент школыш пураш шонен да Йошкар-Олашке толын, но шонымашкыже шуын кертын огыл. Тидлан рвезе нимынярат ойгырен огыл, пӱрымаш корныжо балет училищыш наҥгаен. Лач тыште тудо балет нерген пален налын да ты искусствылан шӱмаҥын.
– Кудымшо классыште икымше гана кумда сценыш лектынам, пырля тунемме ӱдыр-рвезе-влак дене «Тщетная предосторожность» балетыште куштенна. Изи шӱмем лектын вочшашла кӱлткен гынат, чоныштем куан тул ылыжын, – каласкала Саша. – Изиэм годым футболистат, куштызат да эше шуко молат лияш шоненам, но балетын артистше лийме шонымаш трукышто лийын.
Балет школышто 9 классым пытарымеке, А.Чимаев И.С.Палантай лӱмеш тӱвыра да сымыктыш колледжын «куштымаш искусство» факультетышкыже тунемаш куснен. Тушечынак тудын опер да балет театрыште паша корныжо тӱҥалын. Кумшо курсышто тунемше рвезе ятыр балетыште («Анюта», «Бахчисарайский фонтан», «Жизель», «Дон Кихот», «Баядерка», «Василиса Прекрасная», «Корсар», «Ромео и Джульетта», «Русский Гамлет» да молат) кушта.
Балетын артистше ден хореографше-влакын Россий кӱкшытан конкурсыштыжат Саша икмыняр гана мастарлыкым ончыктен.
– Тыгай конкурслан педагог-наставникна Константин Анатольевич Иванов кумылаҥден шога. Тенийысе конкурсышто сеҥымаш – тудын тыршымыже, чон йодмо пашажым йӧратымыже, профессионал улмыжо, садлан моткоч кугу таум каласем, – чонжым почеш самырык чолга куштызо.
Балет труппо дене пырля А.Чимаев ятыр вере гастроль дене лектын коштын. Россий мучко коштмышт годым тудлан Челябинскыште эн чот келшен.
– Зал тич погынышо калык моткоч тӱткын ончен, спектакльым сайын вашлийын. Тугеже тушто балет искусствым йӧратыше-влак илат манаш лиеш, – каласкала Чимаев. – Олажат мотор, яндар. Гастроль дене лектын коштмо тӱрлӧ олам, мотор вершӧрым ужаш веле огыл, профессионально кушкашат, шинчаончалтышым вашталташат сайынак полша. Но калыкыште манмыла, унаште – сай, а мӧҥгыштӧ – эшеат сайрак. Мемнан марий мландыштат искусствым йӧратыше, кугезе тукымын йӱлажым, тӱвыра поянлыкшым аралыше да палыше, тудым тукым гыч тукымыш шуен толшо калык ила.
Театрыште балетым ончымеке, артист-влак чыланат мотокоч серьёзный, пеҥгыде койыш-шоктышан, шагал мутланыше гай койыт. Но Саша дене мутланымеке, шонымашем йӧршын вашталте: поро кумылан, моткочак шке пашажым йӧратымыже шижалте. Арам огыл мутланымашнам тыгай ой дене мучашлыш:
– Балет – тиде илыш, тудым куштымо годым куштылгылыкым, чонышто ласкалыкым, порым шижам.
Алевтина БАЙКОВА
Фотом еш альбомжо гыч налме
