И.С.Палантай лӱмеш тӱвыра колледж пеленысе «Фортепианные витражи» (вуйлатыше Т.Тихонова) клуб Российысе да регионысо конкурс-влакын лауреатше Егор Карпочев дене вашлиймашым эртарен.
Егор – Йошкар-Ола гыч. Изинекак музыклан шӱмаҥше рвезе П.Чайковский лӱмеш, И.С.Палантай лӱмеш тӱвыра да сымыктыш колледж пеленысе йоча искусство школлаште, а вара колледжын «Фортепиано» пӧлкаштыже шинчымашым поген, а кызыт тудо – Н.Г.Жиганов лӱмеш Озаҥ кугыжаныш консерваторийын икымше курсшын студентше.
– Колледжыште тунемме годым шонымашке шуаш опытан, чолга педагог, Марий Эл культурын сулло пашаеҥже Алла Валентиновна Смирнова полшен. Тудын тыршымыжлан кӧра фортепианом утларак йӧратен шынденам да чын шокташ тунемынам. Алла Валентиновна деч шукылан тунемынам, тудак кумда искусство тӱняш корным почын. Тудын шӱкалтышыжлан кӧра шонымемым музык гоч почын пуаш тунемын шуынам, – чонжым почо Е.Карпочев. – А консерваторийыште Татьяна Владимировна Халтуринан классыштыже тунемам. Тудын дечат шуко уым пален налам манын ӱшанем, вет тудо – моткоч талантан пианист.
Вашлиймаште Егор йӧратыме композиторжо-влак, икмыняр шагат дене семӱзгар воктене пашам ыштымыже нерген радамлын каласкален. Мутат уке, тудлан лишыл семӱзгаржым шокталтыде чытен огыл. Тудо С.Рахманиновын «Прелюдии», «Юмореска», «Этюд-картина», И.Бахын «Партита» произведенийже-влакым колышташ темлен. Самырык музыкантын мастарлыкшым погынымашке толшо студент, сымыктыш школлаште тунемше-влак веле огыл, молат (илышыштым йӧршын музык дене кылдыше огытыл) моткоч кӱкшын акленыт. Шокшо кидсовыш ден тауштымо шомакым шке возымо сочиненийжат сулен.
«Фортепианные витражи» клуб ынде ятыр ий туныктымо пашам наҥгаен шога. Тудо музык да искусство тӱняште палыме да лӱмлӧ еҥ, самырык музыкант да чолга коллектив-влак дене чӱчкыдынак вашлиймашым эртара.
А.БАЙКОВА.
А.Бадановын фотожо
