17 октябрьыште И.С.Палантай лӱмеш тӱвыра да сымыктыш колледжыште «Новое передвижничество» манме усталык лабораторий почылтын, увертара республикын Тӱвыра, савыктыш да калык-влакын пашашт шотышто министерствын увер рӱдерже.
Тушко самырык талантан 60 еҥ ушнен.
Мероприятийым почмо дене тушко погынышо-влакым тӱвыра, савыктыш да калык-влакын пашашт шотышто министрын пашажым шуктышын алмаштышыже Елена Бурнашева саламлен.
«XXI курымышто тыгай усталык лабораторийым эртарыме моткоч кӱлешан. Садлан Россий культур министерстве тудым илышыш пурташ кӱлынак полша. Тыгай шӱлышан мероприятий-влак кундемыштына эреак эртаралташ тӱҥалыт манын ӱшаныме шуэш», – каласен Е.Бурнашева.
Кок кече жапыште икшыве-влаклан мастер-класс ден тӱрлӧ вашлиймашым Гнесинмыт лӱмеш Россий музык академийын виолончель, контрабас да арфа кафедрын преподавательже Ростислав Буркин ден П.Чайковский лӱмеш Моско кугыжаныш консерваторий пеленысе Академический музыкальный училищын преподавательже Ирина Брянцева эртареныт.
Усталык мастерскойым эртарен колтымаште Россий культур министерствын да республикын Тӱвыра, савыктыш да калык-влакын пашашт шотышто министерстве тыршеныт.
А.Байкова
Фотом культур министерствын сайтше гыч налме
