Мобилизоватлыме граждан-влакын ешышт гыч йоча-шамычлан «Журавушка» социально-реабилитационный рӱдерыш путёвкым ойырымо.
Неле илыш ситуацийыш логалше йоча-влакым кандарыме да нунын тазалыкыштым пеҥгыдемдыме йодыш дене республикыштына Калык илышым саемдыме шотышто министерстве пашам ышта. «Журавушка» социально-реабилитационный рӱдер – чолга канышым йӧратыше-шамычын верышт, вет лачшымак тыште ӱдыр-рвезе-влаклан у да оҥай тӱня почылтеш.
Таир ер серыште верланыше рӱдер идалык мучко пашам ышта. 14 кечаш сменыште 75 ӱдыр-рвезе каналтен кертеш. Тыгодым нунылан компьютер классыште шинчымашым погаш, тунемме предметла дене консультацийым налаш, усталыкым вияҥдаш йӧн пуалтеш.
Черетан смене 17 октябрьыште тӱҥалеш. Тушко шуко шочшан да неле илыш ситуацийыш логалше, мобилизоватлыме граждан-шамычын ешлашт гыч йоча-влаклан путёвкым ойырымо. Смене жапыште кажне икшыве канен, массаж, тӱрлӧ оборудований, кушкыл да лавыра полшымо дене тазалыкшым пеҥгыдемден, тыгак психологический полышым налын кертеш.
Республикын Калык илышым саемдыме шотышто министерствыже мобилизоватлыме граждан-влакын ешыштлан чыла велымат полшаш ямде.
М.ИВАНОВА
