у машин
КУЧЕМЫШТЕ

Таче тӱҥалаш огыл гын, эрла вараш кодына

25 мартыште Юл кундем кугыжаныш технологический университетыште Марий Эл Кугыжаныш Погын председатель А.Смирновын вуйлатымыж почеш Науко да технологий идалыклан пӧлеклалтше Депутатын кечыже эртен.

Тудо 8-10 класслаште шинчымашым погышо ӱдыр-рвезе-влакым промышленный программированийлан туныктымо Яндекс.Лицей  площадкым торжественно почмо мероприятий гыч тӱҥалын. Тылеч вара депутат ден уна-шамычлан ПГТУ-н IT-инфраструктур объектлажым, информатике да вычислительный технике факультетын науко лабораторийжым ончыктеныт, Волгатехын радиоэлектронике, чоҥымо паша, чодыра промышленность, машиностроений, экономике да медицине аланлашке IT-специалист-шамычым ямдылыме пашаж нерген каласкаленыт. Тыгодым «Грунтомет» устройство, медициныште пайдаланыме роботизироватлыме экзолулеге, пилотдымо снегоход, вездеход-амфибий гай инновационный паша-влаклан поснак кугу тӱткышым ойыреныт. 

Пленар заседанийыште вузын ректоржо И.Петухов Волгатехым цифровой трансформацийын драйверже семын палымым ыштен, выступленийжымат Россий президент В.Путинын шындыме задачыж гыч тӱҥалын: «Шушаш лу ийыште элыштына цифровой трансформацийын, искусственный интеллектын технологийыштым шыҥдараш, кугу данный-шамычым иктешлаш кӱлеш». Игорь Валерьевичын палемдымыж почеш, цифровизаций Российым эшеат сайын вияҥден колташ полша. Но таче IT-аланыште кадр йодыш моткоч пӱсын шога. Тудым решитлыме кугу ужаш кӱшыл тунемме заведений-шамыч дене чак кылдалтын. Таче ПГТУ-што 5000 наре еҥ кӱшыл шинчымашым налеш, 500 наре преподаватель ден науко пашаеҥ тырша, Наукын россий академийже дене пырля 7 лабораторийым почмо, бюджет 1,2 млрд. теҥгеш шуэш. Республиклан инженер кадрым ямдылыме пашаште Волгатех 90 процент ужашым налеш, тышечын пелыжым – IT-направлений дене.

 И.Петухов цифровой трансформацийын идеологийжым системный триаде семын ончыктен, тиде – IT-кадр, у шинчымаш да шуэн вашлиялтше компетенций-влакын ик тошкалтыш гыч весыш нӧлталалмышт, регионын, тыгак Российын экономикыштышт кучылталтмышт.

Ректор вузын корпоративный порталжын, мобильный приложенийжын, онлайн-сервисшын йӧнышт денат палдарен. Поснак кугу тӱткышым IT-специалист-шамычым ямдылыме задачылан ойырен. Тений тиде направлений дене 650 еҥым тунемаш налаш да шинчымашым пуымо у программым илышыш пурташ палемденыт.   

Депутатын кечыштыже Тravel Line компанийын генеральный директоржо А.Галочкин, ACI компанийын генеральный директоржо Д.Габдуллин, «Мегафон Марий Эл Республикыште» ОАО-н директоржо А.Кошкин, «Монета» НКО правленийын председательже В.Маймин эксперт семын выступатленыт. Нуно Волгатехын информатике да вычислительный технике факультетыштыже сай специалист-влакым ямдылыме нерген ойленыт, шочмо республикыште IT-индустрийын квалифицироватлыме кадржым арален кодымо да школышто тунемше-шамычым профильлан кызытсе жаплан келшышын ямдылыме йодышлам нӧлталыныт.

Регионыштына IT-бизнес ден IT-компаний-влакым вияҥдаш приниматлыме мере-шамыч дене промышленность, экономически вияҥмаш да торговльо министрын обязанностьшым шуктышо И.Макаров палдарен. Мутшо почеш, таче республикыштына программный обеспеченийым ямдылыме аланыште 130 наре компаний пашам ышта. IT-индустрийыште 1000 утла еҥ тырша, отрасльыште кокла пашадар – 50 тӱжем утла теҥге. 2020 ийыште компаний-шамычын окса оборотышт 1,6 млрд. теҥгеш шуын. Регионыштына Программный обеспечений разработчик-влакын «ПС Софт» ассоциацийыштым ыштыме. Игорь Васильевич IT-компаний-шамыч ден кум бизнес-инкубаторлан кугыжаныш велым полшымо нергенат ойлен.   

В.Путинын «Россий Федерацийым 2030 ий марте вияҥдыме национальный цель-влак нерген» указше дене келшышын, цифровой трансформаций – национальный цель-шамыч кокла гыч ик эн тӱҥ. Тудын сеҥымашыжлан экономике, социальный сфер, ты шотыштак здравоохранений да образований, тыгак кугыжаныш виктем гай тӱҥ аланлаште цифровой инструмент дене ӱшанлын пайдаланаш тӱҥалмым шотлыман. 

Мероприятий мучаште А.Смирнв ден И.Петухов Марий Эл Кугыжаныш Погын ден Юл кундем кугыжаныш технологический университетын пашам пырля ыштымышт нерген соглашенийым подписатленыт.  

М.ИВАНОВА

Опубликовать в Одноклассники

Добавить комментарий