Марий Эл вуйлатыше Александр Евстифеев Йошкар-Олаште Правосудий пӧртлан пашам ышташыже единый манме оралтым ойырен налаш кӱштен.
Тидын нерген тудо республикын Верховный судшын председательже Артем Грачев дене паша вашлиймашым эртарымыж годым ойлен.
– Тӱнямбал юстицийын ыштышаш пашаже кушкеш. Сандене мировой судья-влакын штатыштым келшышым ышташ кӱлеш, – каласен Александр Евстифеев.
Республикын Верховный судшын председательже Артем Грачев палемден: Йошкар-Олаште да Медведево районышто калык шукеммылан кӧра моло районлаште участке-влакым шагалемдаш да нуным Йошкар-Олашке да Медведевысе судебный районлашке пуаш пунчалым лукмо. Тиде амал дене Медведево районышто у участкым почаш у оралте кӱлеш. Тушто пашаеҥ-шамыч верланышаш улыт да судебный заседаний зал лийшаш. 41-ше №-ан у участкын штатше Курыкмарий районышто иземдыме дене чумыралтеш.
– Тидымак Йошкар-Олаштат ышташ палемдалтеш. Ме Шернур судебный районышто ик участкым петырена да Йошкар-Олаште 42-шо номеран судебный районлан пуэна. Кызыт рӱдолаште мировой судья-влак кум вере верланеныт. Сандене нуным ик вере вераҥдаш кӱлеш, – темлен Артем Грачев.
– Тыге сай лиеш ыле. Поснак еҥ-влаклан, – каласен Марий Эл вуйлатыше Александр Евстифеев.
Ты амал дене регион вуйлатыше мировой судья-влаклан пашам ышташышт ик оралтым ойырен налаш кӱштен.
Марий Эл вуйлатышын организаций да аналитике виктемжын уверже негызеш Л.Камалетдинова ямдылен.
