Марий Элыште тений кеҥежым Союзный кугыжаныш – Беларусь Республикын – тунемшыштын турист слётышт эртышаш.
Кодшо кечылаште регион вуйлатыше Юрий Зайцев тидын шотышто оргкомитетын заседанийжым эртарен. РФ Просвещений министерствын йодмыж почеш слёт мемнан республикыште эрташ тӱҥалеш. Ты мероприятий кок кугыжанышын самырык туристше-влак коклаште кылым пеҥгыдемдышаш да таза илыш-йӱлалан кумылаҥдышаш. Марий Элын тӱрлӧ спорт-турист да патриотический мероприятийлам эртарымаште кугу опытшо уло. Сандене тыгай ӱшаным ыштеныт гын, тиде кугу чап да ответственность. Лач тыге Юрий Зайцев палемден.
Слёт 2007 ий гыч кажне ийын черет дене эртаралтеш. Тений тудо 9-14 июльлан палемдалтын. Беларусь гыч 7, Российысе регионла гыч 30 команде, чылаже 511 участник толшаш.
Мероприятийлан республикын Образований да науко министерствыже да «Роза ветров» йоча да самырык-влакын рӱдерышт вуйын шогат. Ямдылалтме паша кузе кайыме нерген образований да науко министр Лариса Ревуцкая палдарен. Ойлымыж почеш, РФ Просвещений министерствын еҥже-влак регионыш толын коштыныт, «Сосновая роща» тунемме-тренировочный базым ончен савырненыт. Иктешлымашышт почеш, площадке «Спорт туризм» спортын видшын чыла правилжылан келшен толеш. Тушто палаткан лагерь, полевой кухньо, тулолмым ылыжтыме вер лийыт. Слётын программышкыже ориентирований дене таҥасымаш, экскурсий да тӱвыра мероприятий-влакым пуртымо.
Юрий Зайцев слётым эртарыме годым участник-влаклан лӱдыкшыдымӧ лийже манын, задачым шукташ кӱштен.
Марий Эл вуйлатышын пресс-службыжын уверже негызеш Светлана Носова ямдылен.
