Поэзийын тӱнямбал кечыж вашеш кок кугу книга пӧрт: Марий Элын Йошкар-Оласе С.Г.Чавайн лӱмеш да Мордовий Республикын Саранскысе А.С.Пушкин лӱмеш – калыкле библиотеке-влак 18 мартыште «Сылнымутышто – келшымаш аршаш» лӱм дене видеокылым эртарыш.
Тидланже шонымаш мордва родына-влак велым, эн ончычак Мордовий Республикын сулло поэтше Геннадий Гребенцов дечын лектын. Геннадий Сергеевич студент пагытше гычак, 1970-ше ийла мучаш гыч, марий сылнымут дене пеҥгыде кылым кучен шога, тудым у курымыштат вораҥдараш манын, кызытат чолган тырша.
Видеокыл годым кок книгагудын краеведений пӧлкаштышт библиотеке пашаеҥ, туныктышо, сылнымутышто тыршыше-влак погыненыт ыле. Марий-влак могырым тыште Россий писатель ушемын республикысе пӧлкажым вуйлатыше Светлана Архипова, «Ончыко» журналын тӱҥ редакторжо Игорь Попов, поэт Геннадий Ояр, Йошкар-Оласе 2-шо №-ан школын туныктышыжо Людмила Алексеева, руш автор Анна Шеремет лийыныт да ойленыт. Тӱҥ шотышто мордва поэт-влакын почеламутышт марла йоҥалтыныт, тыгак вашла кусарыме сылнымут паша нерген муланымаш лектын.
Мордва родына-влак могырым сылнымутан журналыштын, национальный газетыштын тӱҥ редакторышт да пашаеҥышт чон почын ойленыт, марий поэт-влакын почеламутыштым эрзя да мокша йылмыла дене лудыныт.
Сылнымутышто келшымаш аршашым пидше видеокылым кӱшнӧ каласыме книгагудо-влакын краеведений пӧлкаштым вуйлатыше-влак Светлана Сауляк ден Надежда Бочкарёва вӱденыт. Тыгай кыл умбакыжат пеҥгыдем шогаш тӱҥалеш манын, кок велымжат ӱшанен каласеныт. Видео дене веле огыл, а вашла унала коштын, сылнымут кечыламат угыч эртараш тӱҥалман, маныныт нуно.
Геннадий Сабанцев.
📸Фотом Светлана Архипован воткыл лаштыкше гыч налме.
