Шернур районысо «Земледелец» ялозанлык артельыште пасу пашашке рӱж ушненыт.
Тиде озанлык нур пашам эртарен колтымаште кажне ганат ойыртемалтеш. Теве теният шошо агашке ик эн ончыч лектыч. Чын, техникым пасушко лукмо деч вара лумат лумын кайыш, пасу уэш вӱдыжгыш. Игече саеммеке да кече шыратен ончалмеке, пасушто трактор йӱк уэш ылыже.
Ме ончыгече тиде озанлыкын Лужалу ден Йӱштӧ Памаш кокласе нурыштыжо лийна. Тыште кодшо ийын шӱдӧ наре гектарыште мландым кылмаш куралын кодымо улмаш. Умбачынак тырмалыше агрегатым ужна. Озаже Сергей Веденькин улмаш.
– Тений пасушко пеш ондак лекна, тыгайжым омат шарне – каласкала Сергей Иванович. – Кызыт озанлык мучко иканаште куд агрегат тырмала, вӱдыжгым куча. Тырмален пытаремат, сеялкым пижыктем, икияшым ӱдаш тӱҥалам. Кызыт кажне гаяк механизаторын кок-кум техникыже уло. Мыят шошо агам пытарымеке, кургым ямдылыме пашашке ушнем. А шыжым, уржа-сорла тӱҥалмеке, ныл механизаторна комбайным виктараш тӱҥалеш. Шукерте огыл техникылан техосмотрым эртарышна, чылаже коло кок тракторым аклаш лукмо ыле. Кызыт игече кукшо шога, сандене мландыште вӱдыжгым писынрак кучен кодаш тыршыман, да ме тидым ӱшанлын шуктена шонем.
Сергей Веденькин озанлыкыште латкум ий пашам ышта, Чылдемырыште шочын кушшо пӧръеҥ тӱрлӧ техникым виктарен. Китай гыч кондымо ZOOMLIOV куатле у тракторым лачак тудлан виктараш ӱшанен пуэныт. Тыгай техникыже район мучкат кызытеш уке.
Тений районышто икияшым 18,4 тӱжем утла гектарыш ӱдаш палемдыме. 16 апрельлан урлыкашым вераҥдышаш 2,6 тӱжем гектар мландым тырмалыме, 1220 тонн минеральный ӱяҥдышым кондымо, планым 106 процентлан темыме, 44 процент кокияш озымлан ешартыш кочкышым пуымо.
Снимкыште: механизатор Сергей Веденькин – пасушто.
Вячеслав Смоленцевын фотожо.
