Олмапу, сирень пеледме пагытыште 9-ше але 11-ше класслам тунемын лекше-влаклан Пытартыш йыҥгыр йоҥгалтеш. Ты кече пайрем семын куанлын эрта гынат, чонышто садак шӱлык шижалтеш. А парт коклаште шинчыме пагыт ала-мынярлан шеҥгелан кодеш гынат, тунамсе нӧргӧ, йолташ-влак дене модын юарлыме жап эрелан шарналт кодеш.
Йолташ-влак, «Пытартыш йыҥгыр», школышто тунемме жапда мо дене ушешда лакемалт кодын?
Надежда ЛУКИЯНОВА, И.С.Палантай лӱмеш тӱвыра да сымыктыш колледжын преподавательже, музыковед:
– 2001 ийыште Провой кундем Кужмара кыдалаш школын 9-ше классшым чыла «визытанлан» тунемын лектынам. Тудо жапыштак Йоча сымыктыш школышто шуаралтынам. Йолташ ӱдыр-влак дене кажне пайремлан линейкыште мурым мурымым сайын шарнем. Классыштына коло индешын лийынна. Луымшо классыш кандашынже веле вонченыт, а молышт тӱрлӧ техникумыш, училищыш але вес школлаш тунемаш каеныт.
Пырля тунемме йолташ-влак дене, чаманаш кодеш, огына вашлий. Самырык лиймынам, школ пагытым, «Пытартыш йыҥгырым» фотокартычке-влак веле ушештарат.
Надежда АКИЕВА, кидмастар:
– 1991 ийыште Пошкырт кундем Калтаса районысо Киябак школын 9-ше классшым тунемын лектынам. Тунам кызытсе семын «Пытартыш йыҥгырым» кугун пайремлыме огыл, чылажат скромнан эртен. Пакчаште кушшо сирень укшлам тодыштын конденна, туныктышо-влаклан поро мутым, таум ойленна.
Пырля тунемме йолташ-влакым шочмо ялышкем У ийлан, кеҥежым отпусклан мийыме годым вашлияш тыршем. Мутат уке, кызыт интернет полшымо дене утларакше мутланена.
Лилия ПЕТУХОВА, мурызо:
– Школышто тунемме пагыт кеч-кӧнат чонышто, ушышто шке кышажым кода. Мыят тудым кажне гана чон вургыж шарналтем. Фото, видео-влакымат чӱчкыдын ончалаш кумыл лектеш. Тиде пагытым нимо дене таҥастараш огеш лий. Чон вургыжеш, шӱм кӱлтка, куан шинчавӱдат лектеш. «Пытартыш йыҥгырже» огыл, а тудлан ямдылалтме тат утларак шарнымашеш кодын. Тыгодым мыняр куаным шижат?! Йолташ-влак дене сценарийым шоненна, мурым кычалынна, куштымаш шотышто мутланенна, пӧлекым ойыренна. Пайремлан шуко ямдылалтат, а тиде кече пеш писын жап эртен кая, шижынат от шукто. Тунамже чонлан йӧсырак чучын колта, вет тиде юарлен коштмо жапна шеҥгелан кодеш, чылан тӱрлӧ верыш «шаланен» каена. А ончылнына кӧм мо вуча – огынат пале. Изиш тургыжланет, изиш ойгырет…
11-ше классым тунем пытарымылан – 14 ий. Пырля тунемме йолташ-влак икоян лийынна, икте-весылан эре полшен, веселан иленна. Рвезе-влак мемнам эре араленак шогеныт. Икманаш, нигунам йокрок лийын огыл. Шарналташат уло шуко мом, санденак чӱчкыдынак вашлияш тыршена.
Шукерте огыл ик школыш кызытсе выпускник-влакын «Пытартыш йыҥгырыштым» ончаш миенам. Шкенан годсо дене таҥастараш оҥай ыле. Кызытсе самырык тукым илыш дене тӧр каяш тырша. Мыланем тиде толкын келша да тыгак лийшаш.
А.БАЙКОВА
Фотом интернет гыч налме
