Юрий Зайцев: «Специальный военный операций ветеран-влак ассоциацийын задачыже – пӧръеҥна-шамычлан тыныс илышыш пӧртылаш полшаш».
Тидын нерген Марий Элым вуйлатыше Специальный военный операций ветеран-влак ассоциацийын еҥже-шамыч дене вашлиймыж годым ойлен.
Палемдыме организацийым «Шочмо элым аралыше-влак» кугыжаныш фондын филиалже негызеш СВО участник-шамычын праваштым аралыме, интересыштым шотыш налме, тыгак нуным мер илышыш ушымо шонымаш дене 2024 ийыште ыштыме.
Передовойышто улшо сарзе-влаклан веле огыл, тыныс илышыш пӧртылшӧ ветеран-шамычланат полшаш кӱлеш, палемден регионым вуйлатыше. Тыште ик тӱҥ задачылан Россий президент Владимир Путинын кӱштымыж почеш илышыш пуртымо «Герой-влакын жапышт» программым вияҥдыме паша шотлалтеш.
Кызыт Марий Элыште программын аналогшым – «Марий Элын Геройжо-влак» проектым – илышыш пурташ ямдылат. Тудын полшымыж дене СВО-н участникше-шамыч самырык тукымым туныктымо да воспитатлыме системыште, мер ушемлаште, бизнесыште, кугыжаныш да муниципал виктемлаште вӱдышӧ позицийым налын кертыт.
«Тылеч посна санаторий-курорт организацийлаште эмлалташ, спорт дене заниматлалташ, юридически полшаш йӧным ончыкыжат ыштена, тыгак ветеран-влакым самырык тукымым шочмо элым йӧратыме шӱлышеш куштымо пашашке ушена. Патырлык урок – пашанан кӱлешан эше ик аспектше. Йоча ден подростко-шамыч геройна-влакын мо верч кредалмыштым палышаш улыт», – ешарен Юрий Зайцев.
Ассоциацийын еҥже-влак службышт нерген каласкаленыт, организацийым вияҥдыме да боец-шамычлан полшымо шотышто шке шонымашыштым ойленыт.
Специальный военный операцийыште участвоватлыше кажне сарзын шке историйже да подвигше, да нунын нерген каласкалаш кӱлеш, вашлиймашым мучашлыме годым палемден Юрий Зайцев.
Марий Элым вуйлатышын пресс-службыжын уверже негызеш Маргарита ИВАНОВА ямдылен
