Татарстанысе Менделеевский районысо Элнет школын тунемшыже-влак СВО-што улшо боец-влаклан полшат.
Нуно масксетьым пидыт, 23 февральлан, Элым аралыш кечыжлан, саламлыме открытке-влакым ямдылат. Саламлымаштышт ӱдыр-рвезе-влак Шочмо элнам аралымаште героизмым да лӱддымылыкым ончыктымылан специальный военный операцийын участникше-влаклан кугу таум ойлат. Тыгак тыныслыкым, порылыкым, тазалыкым да сеҥымаш дене вашкерак мӧҥгӧ пӧртылаш тыланымашым возат.
Агрыз районысо Буймо селаште «Порылыкын шӱртыжӧ» отрядын волонтёржо-влак СВО-што участвоватлыше мобилизованный ден доброволец-влаклан, тыгак госпитальыште улшо-шамычлан гуманитарный полышым эреак погат. Нунын деке Мандык ялыште илыше-влакат ушнат. Пелемеш селан волонтёржо-влакат гуманитарный полышым чумыреныт. Тушто эм, вургем, шудо чай, сукара, гигиене средства, молат улыт.
«Ӱшанена, мемнан полышна салтак-влаклан шочмо мланде гыч поро увер да эн шерге пӧлек лиеш» — маныт верысе чолга марий-влак.
📸Фото — Татарстанысе да Казаньысе марий-влак воткыл лаштык гыч.
