Кодшо номерыште чын итальянец Сандро Лупини итальян калыкын ик эн кумдан палыме да йӧратыме «Лазанья» кочкышым ышташ туныктыш.
Тачат тудынак эше ик рецептше дене палдарена.
«Тидат – шыл кочкыш, – каласкалаш тӱҥале Сандро. – Рушлашке кусараш гын, «тунецан соус дене шыл» манме лиеш. А итальянла тыге йоҥга:
«Вителло тоннато»
Кӱлеш:
- 1 кг сӧсна шыл,
- 1-2 л вӱд,
- 2 лавр лышташ,
- 5 пырче гвоздике,
- 5 пырче шем пурыс,
- 1 кугу совла шинчал.
Тыге ямдылыман:
* шылым мушкына, каструльыш пыштена, вӱдылалтмешкыже вӱдым темена, тушко лавр лышташым, гвоздикым, пурысым, шинчалым пыштена да кӱмешкыже шолтена;
* ынде шылым луктына, йӱкшыктарена (тыге тудым пӱчкедаш куштылгырак лиеш) да кокла кугытан да 1 см наре кӱкшытан ужаш-влаклан пӱчкедена;
* нуным мотор кӱмыжыш оптена, ӱмбакше «Мӧҥгысӧ майонезым» йыгена».
«Мӧҥгысӧ майонез»
Ынде майонезым ямдылаш тӱҥалына. Мут толмашеш ойлаш гын, тудым мӧҥгыштӧ шке ышташ лийме нерген паленам, но нигунамат тӧченже ончен омыл. А тиде ешыште уна лиймем годым Сандрон 5 секундышто манме гай тудым ямдылымыжым ужын, ончыкыжым майонезым эре шке гына ышташ кумылаҥ тольым. Да, чынжымак, толмекем, эн ончычак тудым ыштен кочкын ончышым! Товатат, шкемынат пеш тамлын лекте да ышташ нимо йӧсыжат уке! Сандене тендам утларакше лачшымак майонезым ышташ туныкташ шонымаш дене тиде шыл рецептшымат темлаш кумыл лектын! А ик гана шке ямдылен ончеда гын, вес гана кевытыште йӧршынат налаш огыда тӱҥал, шонем.
Сандро умбакыже палдарыш: «Мӧҥгысӧ майонезым ямдылаш теве мо кӱлеш:
* 2 муно,
* 200 г кушкыл ӱй,
* пел лимон сок,
* ик чывыштыш шинчал.
Тыге ямдылыман:
- келгырак атыш кок муным, ик чывыштыш шинчалым пыштена да блендер дене эркын лугаш тӱҥалына;
- тиде жапыште тушко ӱйым эркын йоктарен ешарена да нугыдеммешкыже да ошеммешкыже умбакыже лугена;
- пытартышлан пел лимонын сокшым ешарена да эше изиш лугена.
Майонез ямде!»
Шке гыч каласынем: тудо тӱсшӧ денат, нугыдылыкшо денат кевытысе гаяк лектеш, но тӱҥ ойыртемже – нимогай химий уке да натуральный!
Тиде кочкыш «тунец соус дене шыл» маналтеш. Сандене, ӱйжым ястарен, «Тунец» консервым ешарыман да эше изиш лугыман. Ынде шыл пӱчкыш-шамыч ӱмбаке йыгыман да «Вителло тоннато» ямде! Тудым «кокымшо блюдо» семын кочкаш келшен толеш.
А тунецан майонезшым киндыш шӱрен, бутерброд семынат кочкаш лиеш. Паледа, могай тамле?! Мый палем!
Любовь Камалетдинова
Авторын фотожо
