Теҥгече, 26 декабрьыште, Марий Элын кандашымше созыв Кугыжаныш Погынжын нылымше сессийже эртыш.
Тушто депутат-влак чылаже 25 йодышым ончышт. Марий Эл Республикысе судья-влакын квалификационный коллегийыштын составышкыже общественность деч 7 представительым палемден пеҥгыдемдышт. Кокымшо йодыш республикыште «Налогым тӱлыктымӧ простаҥдыме автоматизироватлыме системе» у специальный налог режимым пуртымо нерген ыле. Тудым 2025 ий 1 февраль гыч илышыш шыҥдараш палемдалтеш.
Алкоголян йӱышым рознице гоч ужалымаште ешартыш чарымашым ыштыме дене кылдалтше йодышат моткочак кӱлешан. Ынде шуко пачеран пӧртлаште але тудын пелен верланыше але чоҥымо кевытлаште, калыкын кочмо верлаште (ресторан деч посна) алкогольым 22 шагат гыч 11 шагат марте ужалаш чаралтеш. Алкоголян йӱышым ужалаш чарыме кече-влак радамыш 11 сентябрь (Всероссийский айык кече) да 25 май («Пытартыш йыҥгыр» кече) ешаралтыт. Тиде 2025 ий 1 сентябрь гыч илышыш пура.
Инвалид икшыван еҥ-влаклан ойыралтше мланде участке олмеш окса выплатым налаш права пуалтме, Шернур районышто Емелан почиҥга ялым Шокшем Памашыш ушымо нерген пунчал-влакым луктыч.
Мланде отношенийым шотыш кондымо, тулык йоча-влаклан илыме верым ситарыме, верысе самоуправлений орган-влакын кугыжаныш полномочийым шуктымышт, административный правонарушенийым ыштымылан мутым кучышашым палемдыме шотышто законлашке вашталтышым пуртышт.
Ийготыш шудымо-влакын перныл коштмышт да правонарушенийым ыштымышт шотышто профилактике, шуко пачеран пӧртлаште тӱшка погым капитально олмыктымо пашам виктарен колтымо, кугыжаныш собственностьышто улшо погым кучылтмо дене кылдалтше закон-влакым федеральный законодательстве дене келыштарышт.
Марий Эл парламентын пашажым саемдаш манын депутат-влак «Марий Эл Республикын Кугыжаныш Погынжын депутатше-влаклан сайлыше-влакын наказышт нерген» у законын проектшым каҥашышт да законодательный органын Регламентышкыже вашталтышым пуртышт. Ынде парламентыште «правительственный шагат» форман заседаний эртаралташ тӱҥалеш. Тудо идалыкыште кок гана деч шуэн огыл лиеш да 1 шагат шуйна.
Марий Эл Республикын Молодёжный парламентше нерген положенийын у редакцийжым пеҥгыдемдышт, «Марий Эл Республикын кугыжаныш кучемжын законодательный органжын наградыже-влак нерген» пунчалын проектшым каҥашышт.
Кум программым пеҥгыдемдышт, тиде – Кугыжаныш Погынын кандашымше созывшын 2029 ий марте полномочийже шуйнымо жаплан паша программыже, 2025 ийлан законопроектный пашаже да паша программыже-влакым.
Тенийысе пытартыш сессийыште депутат-влак Марий Эл Республикын 15 законжым да Кугыжаныш Погынын 28 пунчалжым приниматлышт.
Сессийым мучашлыме годым Кугыжаныш П огын председатель Михаил Васютин депутат, уна да республикыште илыше-влакым шушаш У ий дене саламлыш, тазалыкым, пиалым, пашаште кӱкшытым да ик эн тӱҥжӧ – шукертсек вучымо сеҥымашым тыланыш.
Любовь Камалетдинова
Авторын фотожо
