30 майыште Марий Элын шымше гана погымо Кугыжаныш Погынжын коло кудымшо сессийже эртен. Депутат-влак «Марий Эл Республик вуйлатышым сайлымаш нерген» законыш вашталтышым пуртымо дене кылдалтше улыжат ик йодышым онченыт.
Вашталтышым регионысо законодательствым федеральный дене келыштараш кÿлмылан кöра пуртымо. Законын у редакцийже дене келшышын, ынде республикысе эн кугу постыш кандидат-шамыч сайлыме объединений-влак деч веле огыл, шкешт дечат ойыралтын кертыт.
Кокымшо случайыште кандидат Марий Эл кумдыкышто регистрироватлалтше сайлаш праван чумыр еҥ гыч ик процент ужаш калыкын «йÿкшым» погышаш. Таче кечылан тиде 5320 еҥ, тиде чотыш шкенжым шке ойырышо кандидатым поддерживатлыше олаласе ден районласе погынымаш-влакын депутатыштын, тыгак муниципальный образованийым вуйлатыше-влакын «йÿкышт» огеш пуро.
Депутат-шамыч тыгак СМИ-лашке вераҥдаш пуымо, калык коклаште шаркалаш тÿҥалме деч ончыч чыла агитматериалын копийжым сайлыме комиссийыш конден ончыктымо, кандидат-шамычлан агитматериаллаштышт йот агентлан шотлымо еҥ ден СМИ-влакын мутышт улмым сайлыше-влаклан увертараш кÿлмö да моло у йодмашым пеҥгыдемденыт.
Марий Эл Республик вуйлатышым сайлыме кечым палемдыме шотышто сессийым Кугыжаныш Погын тений 10 июньышто эртара.
М.ИВАНОВА
