Ял гыч олашке илаш куснымо амал «ялысе» ешартышым налашлан чарак лиймым чарна.
Ялозанлыкыште 30 ий да тылеч утларак жап пашам ыштыше да ялыште илыше пашадыме пенсионер-влак 2019 ий январь гыч пенсийышкышт ешартышым налыт. 2021 ий 26 майыште лукмо «Россий Федерацийын посна законодательный актлашкыже вашталтышым пуртымо нерген» федеральный закон 2022 ий 1 январь гыч вийыш пура. Тудо «ялысе» стажлан ешартыш оксам налше пенсионер-влаклан тиде льготым олашке илаш куснымышт годымат арален кодаш йӧным ышта.
Кызыт закон дене пеҥгыдемдыме выплатыш 25 процент кугыт ешартыш оксам ялыште илыше-влаклан веле палемдат. Пенсионерын олашке илаш куснымыж годым тудым кораҥдат.
Илыме верым вашталтымылан кӧра пенсийын кугытшым угыч ончымо да «ялысе» ешартышым кораҥдыме улмаш гын, 2022 ий 1 январь гыч тудым йодмаш деч посна автоматически пӧртылтат.
Тений «ялысе» стажлан шоҥгылык шотышто пенсийыш тылзе еда 1511,12 теҥгем ешарен тӱлат, инвалидность шотышто пенсийым налше-шамычлан – 755,56 теҥгем. Ешарыме оксам пенсий дене пырля тӱлат.
Ешартыш оксам вольыкым, кушкылым да колым ончышо колхозышто, совхозышто да моло ялозанлык предприятий ден организацийыште 30 ий деч шагал огыл жап пашам ыштыше ялысе пенсионер-влак налаш праван улыт. Ешартышлан правам пуышо профессий радамыш 500 утла лӱмым пуртымо, тудым Россий Пенсий фондын сайтыштыже муаш лиеш.
Таче кечылан Марий Элыште «ялысе» ешартышым 9319 пенсионер налеш.
М.ИВАНОВА
