Марий Элым вуйлатыше Юрий Зайцев республикыште эртыше «Марий Элын студент шошыжо-2026» фестивальыште сеҥыше-влакым саламлен.
Самырык-влакын полатыштышт лийше гала-концертыште регионым вуйлатыше самырык тукымлан моштымашым ончыкташ йӧным пуышо тыгай мероприятийын кӱлешлыкшым палемден. «Мемнан студент-влакын мастарлыкышт ий гыч ийыш вияҥеш, тидым нуно 2025 ийыште Россий кӱкшытыштӧ пеҥгыдемденыт. «Студент шошо» – фестиваль гына огыл, а мастарлык сандалык. Тушто кажныже уло вий-куатшым пыштен, талантшым ончыктен кертеш», – каласен Юрий Зайцев.
Тудо сеҥыше-влаклан 50 тӱжем теҥгеаш сертификатым кучыктен. Регионысо программылан Гран-прим Марий кугыжаныш университет сеҥен налын, а «Студент шошо» фестивальын Гран-прижым – Юл кундем кугыжаныш технологий университет.
Тенийысе усталык таҥасымаш икмыняр йыжыҥ дене эртен. Вузлаште март-апрельыште 1200 утла студен, ойыртемалтме йыжыҥыште 400 утла еҥ моштымашым ончыктен. Варажым МарГУ ден ПГТУ-н факультетше-влак вич регионысо программым ончыктеныт, лач нунын кокла гыч эн виянжым ойыреныт да сеҥыше семын палемденыт.
Регионысо программым иктешлымеке, 40 еҥан делегацийым чумырымо. Тудо тений 24-29 июньышто Красноярскыште эртаралтше «Российысе студент шошо» XXXIV фестивальыште мастарлыкым ончыкта.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Марий Элым вуйлатышын пресс-службыж гыч налме.
