Эртыше кечылаште «Марий Эл» ий полатыште Марий Элын спорт министерствыжын коллегийжын заседанийже эртен.
Тушто саламлыме мутшым Марий Эл правительстве председательын алмаштышыже – тӱвыра, печать да калык-влакын пашашт шотышто министр Константин Иванов ойлен.
Вашлиймашын тӱҥжылан 2025 ийыште ыштыме пашам иктешлымаш шотлалтын. Ӱмаште ты аланыште Россий кумдыкыштат у кӱкшытыш шумо. Тидыже регионын правительствыжын вуйлатыше Юрий Зайцевын полышыштлан кӧра ышталтын. Эртыше идалыкыште спортышто могай результатыш шумо нерген спорт министр Сергей Мухортов палдарен. Кугу тӱткыш кундемыште спорт инфраструктурым вияҥдымашлан, тале спортсмен-шамычым полышым пуымылан, таза илыш-йӱлам илышыш шыҥдарымашлан ойыралтеш.
Ты кечынак спорт аланыште тыршыше-влакым наградитленыт. Спорт туризмыште Россий, тӱнямбал кӱкшытыштӧ сай результатышт дене ойыртемалтмыштлан Российын спорт мастерже удостоверенийым Рустам Урдяков дене Игорь Дмитриевлан кучыктеныт.
Заседанийыште почётан уна семын «Герои Марий Эл. Талешке-влак» кадр программын участникше Ислам Шагиев лийын.
Фотом «Виктория» СШОР-ын соцкыл лаштыкше гыч налме.
