Волжский район Сотнур селаште чапле оралте ятыр уло, ик Ужар уремыштак тыгайжым кумытым чоҥен шындыме. Нунын кокла гыч иктыже Александр Алексеевын. Тудо лачак саварым ыштен, мончаончылым блокхаус дене комыжлен.
– Чоҥаш кӱлеш, — ойла суртоза. Мландым администраций гоч оксала налме, чылаже 20 сотык уло. Пӧртын проектшым шке ыштенам. Шке жапыштыже кермычым чыла пошкудо Татарстан гыч налынна, тушечын мемнан марте лишылрак, шупшыкташ йӧнанрак – роскот шагалрак. Пӧрт пырдыжшым йолташ-влак нӧлташ полшеныт. Суртын кумдыкшо — 10х15 метр. Кызыт саварым ыштен пытарыман, машинавечым нӧлтыман.
«Кермычышм могай ак дене налында?» йодышемлан Александр вашештыш:
– Латшым тенгеат витле ыр ыле, но кызыт ынде — коло ныл тенге. Чоҥымо материал шергешт толеш.
Пӧрт пырдыжшын кӱжгытшӧ — 50 см, тыгай блок шокшым сайын куча.
– Кузе шонеда, самрык-влаклан ялыште пӧртым чоҥаш йӧн уло мо?
– Конечно лиеш! — ойла Александр. Эн ончычак оксам погыман, вара чоҥымо материалым кычалман. Кызыт пӧртым чоҥаш нелырак, адакшым пашажат уке, а уло – пашадар изи. Ондак мыланемат йолташ-влак ойленыт ыле:
«Молан ялыште ыштет? Лучо ола воктене ыште». Но мылам гын ял келша! Александр уло кумылын сурт-печыжым ончыктыш. Машинавече воктене, леваш йымалне, тротуарысе плиткым да блокым ышташ оборудованийым вераҥдыме, воктенак — керамзит.
– Оралтым ышташ блок ятыр кӱлеш. Моло арверымат ышташ лиеш, формыжым веле вашталтыман, — ойла суртоза.
Вара суртоза мончам ончална. Тыште паша ятыр: окнам шындыман, кӱварым шарыман. Икманаш, яра шинчаш жап уке.
М.СКОБЕЛЕВ
Авторын фотожо
