Т.Евсеев лӱмеш калыкле тоштерыште Кугу Сеҥымашлан 80 ий теммылан пӧлеклалтше «Шып фронт» ончер почылтын.
Экспозицийыште Кугу Отечественный сар жапысе предприятий, тылын труженикше ден фронтовой бригаде-влакын пашашт ончыкталтыт. Мутлан, мемнан кундемыште тылыште лӱмлӧ ученый-влак ыштеныт, ончыкылык лётчик-влакым туныктеныт, фронтыш колтышашлык бригаде-влакым ямдыленыт. Тышечак шокшо вургем, тӱрлӧ ӱзгар, чодыра, кочкыш колталтын.
Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ончерын поснак самырык-влаклан кӱлешлыкышым палемден. Сеҥымашым фронтышто гына огыл, тылыштат таптеныт.
Ончер икмыняр ужаш гыч шога: сар тӱҥалтыш, республикыш предприятий ден еҥ-влакым эвакуаироватлымаш, сар годым тӱвыра учреждений-влакын пашашт. Шуко архив фотографийым, тоштер фонд гыч тӱрлӧ арверым ужаш лиеш. Эшежым ончер аудио да интерактивный йӧн дене пойдаралтын. Мыланем поснак изи «Курымашлык тул» семын ыштыме экспонат келшыш. Тудын ӱмбаке сар жапыште вуйым пыштыше герой-влакын фотосӱретыштым вераҥдыме.
Сар годым салтак-влакын кумылыштым нӧлтышӧ фронтовой бригадылаш пурышо тӱвыра пашаеҥ-влакланат кугу вер ойыралтын.
Снимкыште: «Шып фронт» экспозицийыш пуртымо экспонат-влак.
Светлана Носован фотожо
