12-13 ноябрьыште республикысе Калык-влакын келшымаш пӧртыштышт «Российын регионжо-влак элнан военный историйыштыже” VII всероссийский шанче-практик конференций лиеш.
Тудо 1941-1945 ийласе Кугу Отечественный сарыште Сеҥымашлан 80 ий теммылан пӧлеклалтеш.
Тудым эртарымашке Йылмым, сылнымутым да историйым шымлыше В.М.Васильев лӱмеш марий институт да Марий кугыжаныш университет ушненыт. Конференций 2019 ий гыч кажне ийын «Без срока давности» научно- просветительский проект кышкарыште эртаралтеш. Тудо Россий президент Владимир Путинын кӱштымашыже почеш илышыш шыҥдаралтеш да Шочмо элын историйжым шояклен умылтараш тӧчымӧ ваштареш, тичмаш гражданский исторический шарнымашым арален да самырык-влакым патриот шӱлышеш шуарен толмылан у шӱкалтышым пуымашке виктаралтеш.
Конференцийыште 150 наре еҥ ушна, тиде – шанче да эксперт сообществын специалистше, кугыжаныш кучемын еҥже, мер пашаеҥ, поисковик, тунемше да журналист-влак. Нуно элнан 33 регионжо гыч лийыт. Военный историйым шымлымаште тургыжландарыше йодыш-влакым тӱрлӧ велым каҥашаш тӱҥалыт. Пленар, секцийлаште погынымаш-влак, военно-исторический тематике дене ончер, тыгак мастер-класс-влак пашам ышташ тӱҥалыт.
Светлана Носова
