Соцфонд россиян-влакым кугыжаныш огыл пенсий фондлаште погымо оксашт дене палдараш тӱҥалеш.
Апрель мучаште законыш келшыше тӧрлатымашым пуртымо деч вара кугыжаныш огыл пенсий фонд-влакын клиентышт погымо суммышт да тӱрлӧ выплатлан правашт нерген уверым налаш тӱҥалыт.
Фонд тыгай шотан уверым ӱдырамаш-влаклан 40 ияш лиймышт деч вара кум ийлан ик гана колта, пӧръеҥ-шамычлан – 45 ийым темымышт деч вара. Икымше палдарымаш шушаш ийын 1 июль гыч 31 декабрь марте лиеш. Граждан-влак уверым Кугыжаныш услуго порталысе личный кабинетышт гоч налыт.
Законыш пуртымо тиде тӧрлатымаш калыклан ончыкылык пенсийын кугытшо нерген уверым пайдалынрак иктешлаш йӧным ышта.
Марий Элыште пенсийым 376 тӱжем еҥ пога.
М.ИВАНОВА
Фотом интернет гыч налме
