18-21 ноябрьыште Саранскыште «Шумбрат, Финно-угрия туристическая!» медиафорум эртен.
Участник радамыште самырык радиовӱдышӧ, блогер, мокша ӱдыр Оксана Белкина лийын:
– Мемнан кундем нерген лишкырак пален налаш манын, элнан шым регионжо гыч толыныт. Ты вашлиймаш шукыштлан сай кумылым коден. Нуно кызытат серышым возат, шокшын вашлиймылан тауштат.
Мероприятий тӱвыргӧ лектышан ыле. «Йыргешке ӱстел» йыр финно-угор калык-влакын илыме верыштышт туризм паша шукталтме нерген мутланенна. Образовательный семинарыште толшо-влакын интернет блогыштым онченна. Семинарым Российысе калык-влак ассамблейын пресс-службыжын вуйлатышыже Анжелика Засядько вӱден.
Экскурсий дене Подлесная Тавла эрзя ялыш да Зарубкино мокша селаш миенна. Зарубкино – мыйын шочмо верем. Тушто мастер-класслаште калык вургемым чияш, мелнам кӱэшташ туныктеныт.
Мероприятийыште эн тӱҥлан ваш палыме лийын кутырымым шотлем. У йолташ-влак шке кундемыштышт этнотуризм, блогерстве могырым могай паша ышталтме дене палдареныт. Участник-влак уста да чолга лийыныт. Регионлаште нунын гай шукын улыт гын, мемнам сай ончыкылык вуча.
Медиафорумыш Башкортостан, Челябинск, Оренбург область, Алтай, Чуваш да Марий Эл гыч лийыныт.
Шочмо кундемна гыч ты мероприятийыш Звениговысо йоча усталык рӱдерын вуйлатышыжын алмаштышыже Анна Новоселова миен коштын:
– Ныл кечыште ме мокша да эрзя тӱвыра нерген шуко оҥайым пален налынна, мордва калык кочкышым тамлен онченна. Тыгак Эрьзя лӱмеш сӱрет сымыктыш тоштерыште лийынна, театрлашке коштынна.
Ты мероприятий мылам пеш келшен. Тудын участникше-влак дене ме умбакыже пырля пашам ышташ мутланен келшенна.
О.МОШКИНА
А.Новоселован фотожо
