26 октябрьыште Национальный художественный галерейыште марий, удмурт, мордва да икмыняр моло калыкын муро ден семже торашке шергылтын. Тушто родо-тукым финн-угор калык-влакын кечыштлан пӧлеклалтше «Краски и ритмы финно-угории» выставке-концерт эртен.
Пайремыш погынышо-влак мордва калыкын тӱвыраже, ыштыш-кучышыж дене лишкырак палыме лийын кертыныт. «Парынза» фольклор ансамбльын участникше-влак сӱан йӱла дене кылдалтше мурым йоҥгалтареныт. А видеокыл полшымо дене вашлиймашке чумыргышо-влакым Российысе калык-влак пӧртын вуйлатышыже Анна Полежаева, тыгак Карелий, Коми, Удмурт республикла, Хант-Мансий автоном округ-Югра гыч усталык коллектив-влак саламленыт да шке кундемышкышт унала ӱжыныт.
Тӱрызӧ, историй науко кандидат Вера Ковалеван ӱштым парня дене шӱртым пунен ышташ туныктымо мастер-классшым ончаш, эрзя да мокша тамга-влакым кучылтын ямдылыме солыкшо, шовычшо да моло арвержым выставкыште ужаш куанле ыле. Мо оҥайже, ӱштым ямдылыме паша кид йыжыҥым эмла веле огыл, тазалыкымат пеҥгыдемда улмаш. Тидын нерген кидмастар пеш кужун каласкалыш.
Венгр, коми, мордва да марий муро, сем поянлыкым «Падыраш», «Чон оҥгыр» да «Сото вий» ансамбль-влак, тыгак мурызо-шамыч Зоя Берникова, Светлана Яндукова, Эльвира Петрова, Иван Соловьев, Марина Воронцова да Даниил Коротков почын пуаш полшеныт. Поэтессе Альбертина Иванован коми, мордва да финн поэт-влакын марлаш кусарыме почеламут-влакым лудмыжымат пайремыш погынышо-влак шокшын вашлийыныт.
Надежда Имаеван сылнымут корнылам финнла лудмыжат шокшо кидсовышым сулен.
Мордовий гыч толшо уна-влаклан Тӱвыра, савыктыш да калык-влакын пашашт шотышто министрын алмаштышыже Игорь Садовин таум каласен да Финн-угор калык-влакын Юл кундемысе рӱдерыштлан Таумутым кучыктен. Пайремыш погынышо-влакым тыгак Российысе финн-угор калык-влак ассоциацийын марий пӧлкажым вуйлатыше Светлана Пехметова, Марий тӱвыра рӱдер вуйлатышын сомылжым шуктышо Василий Петров саламленыт.
– Марий-влак дене вес регионлаште ятыр гана вашлийынна, а Марий Элыште икымше гана улына. Тыште унам вашлийын да ончен пеш моштат. Йошкар-Ола мучко коштын эртышна, ола – пеш мотор, яндар. Рестораныште марий кочкышым тамлышна, мутат уке, мемнан дене икгайлык уло, – палемдыш «Парынза» ансамбльым вуйлатыше Пелагея Тюрькина. – А тыгай мероприятий икте-весе нерген кумданрак пален налаш да родо-тукым кылым пеҥгыдемдаш моткоч кӱлешан. Ынде тендамат мемнан деке пагален ӱжына.
А.БАЙКОВА
М.Скобелевын фотожо
Снимкыште: «Парынза» ансамбль
