Лаштыкнан тачысе унаже — У Торъял районысо Какшан мучаш селаште (Пектубаево) ялеш шочын-кушшо да кызыт М.Шкетан лӱмеш Марий кугыжаныш драме театрыште пашам ыштыше Алексей Тетерин.
Верысе школ деч вара Алексей Санкт Петербургысо театр академийыште мастарлыкым шуарен. Тудым 2005 ийыште пытарымеке, М.Шкетан лӱмеш Марий кугыжаныш драме театрыш пашаш толын. Ынде 12 ий тудо йӧратыме сомылжым шукта, сценыште тӱрлӧ образым чоҥа.
Артист лияш мо таратен? Могайрак рольым тудлан модаш келша? Яра жапшым кузе эртара? Нине да моло нерген пален налаш манын, шкеж дене мутланышна.
— Изи годым ялысе шуко рвезе тракторист, комбайнёр лияш шона. А тылат могай профессий келшен?
— Изиэм гождым чӱчӱэм дене автомашинаш шинчын кошташ йӧратенам. Сандене кушкын шуамат тудын гай тале водитель лияш шоненам. Но ийготым погымо дене шонымаш вашталтеш. Школышто тунемме годым класс вуйлатыше, марий йылме ден литературым туныктышо Лидия Борисовна Пауткина артист кумылан улмем шижын шуктен. Класс дене «Кеҥеж йӱд» спектакль гыч ужашым, «Кем ургызо» сценкым, «А зори здесь тихие» кино гыч ужашым модын ончыктенна. Изирак спектакльна дене пошкудо яллашкат коштынна.
— Сандене артист корным ойырен налынат?
— 11-ше классым пытарымеке, умбакыже тунемаш кайыме йодыш моткоч тургыжландарен, авамат ты шотышто колянен. Икана тудо Ирина Сергеевна Любимова дене вашлийын. Тудыжо тунам Шкетан лӱмеш театрыште администраторлан пашам ыштен. Тудо артистлан тунемаш кайыме нерген ойлен. Мыламат тыгай ой келшен. Адакшым вет ялысе рвезылан Санкт-Петербургым ужаш да тушто тунемаш — кугу пиал.
— Тунем толмеке, икымше ролет могай лийын?
— Эше тунемме годымак «Салика» спектакльыште массовкышто, а варажым «Блин-2», «Кронуш» спектакльлаште роль-влак лийыныт. «Каче-влак» постановкышто массовкышто модмо годым Осяндрын образыште Андрей Васильевын модмыжым куанен онченам. Роль оҥай чучын. Шонымашем шукталтын, кызыт ты спектакльыште тиде образыштак улам.
— Тылат комедийыште але драмыште тылат модаш утларак келша?
— Комедийыште. Мыйын ролемжат утларакшым комедийыште улыт. Мутлан, «Оръеҥ мелнаште» — Селифон, «Эх, кушто ӱдырым муаш?» спектакльыште — Василий, «Кугэргыште» — Сильва, «Вождь краснокожих» комедийыште — Сэм да молат. Тиддеч посна «Юмынӱдырыштӧ» — Митяй, «Морко семыште» ик йолан пӧръеҥ роль-влакат лишыл улыт.
— Тӱҥалтыште марла сайын мутланаш тылат неле лийын, маныт…
— Шарнем тиде пагытым: тӱҥалтыште нелырак чучын, а вараже «йылме рудалтын». Ялна марий гынат, йолташем-влак дене шукыж годым рушла мутланенна. Адакшым вет сценыште марла веле огыл, а марла чын мутланаш кӱлеш.
— Театр деч посна тый эше Рӱдӧ каныме паркыште пашам ыштет?
— Туштат 12 ий ыштем. Уремысе театрынат пашаже оҥай. Кажне пайремлан йоча ден кугурак-влаклан оҥай программым ямдылена, модыш, конкурс-влакым эртарена, тӱрлӧ костюмым чиена. Икшыве-шамычым ондалаш ок лий, нунын дене ик жаплан йоча лийын моштыман, тунамак кугыен улметым мондыман огыл, иктаж улан туныктыман. Адакшым шкеат кок шочшан ача улам, сандене ньогалан мо кӱлеш, нунын дене кузе кояш, кумылыштым кузе кӱзыкташ — чыла палыме. Кажне йочан шӱмышкыжӧ корным муын моштыман. Арам огыл тидын нерген кугурак-влак ончычсекак ойлат.
— Йоча интермедийлан сценарийым ямдылыме сомылат тылат лишыл?
— У ий, Пеледыш пайрем нерген интермедийым ямдылыме. Сценарийым возымо годым тӱрлӧ книгалан эҥертем, тыгак интернетат полша. Но эн тӱҥжӧ — йоча-влаклан кеч-можымат модыш гоч умылтараш тыршет.
— Яра жапым кузе эртарет?
— Еш дене пӱртӱсыш лекташ, шочмо кундемыш миен толаш тыршена, йолташ-влак денат вашлийына. Йоча годсекак футболым йӧратем. Ялыш мийыме годым, йолташ-влак дене погынен, футболла модына. Кызыт эргынат спортын тиде видше дене кылым куча, командышт дене тӱрлӧ турнирыште сеҥыше-влак радамышкат лектыт.
Алевтина Байкова мутланен.
(Фотом театрын архивше гыч налме.)
