Кикнур ялысе централизованный клуб системын Унтыжвал (Цекеево) тувыра пӧрт пелен пашам ыштыше «Мадына» изи форман марий этнографий театрын коллектившылан «калык самодеятельный коллектив» лӱмым пуэныт.
Тидын шотышто Киров областьысе тӱвыра министр Т. Мазурын приказше 14 августышто лектын. Ты коллектив куд ий ончыч кружок семын ышталтын, а идалык ончыч театрыш савырнен. Ты жапыште район, область кӱкштыштат чапым налын шуктен. Тӱҥалтыш гычак тудым марий ӱдырамаш Алевтина Домрачева вуйлата. Ойлымыж почеш, театр тӱрлӧ шӧрынан. Марий калык йӱла дене палдарыме чыла формым кучылтеш. Участник-влак мурат, куштат, модыт, тӱрлӧ йӱлам ончыктат, мутат уке, марий вургем дене. Шке выступленийыштышт марий ыштыш-кучышышт дене пайдаланат, ончерымат эртарат, марий кочкыш денат сийлат. Коллектив кугужак огыл, лучко наре еҥым уша.
С.НОСОВА
