Морко районын концертшым Йошкар-Олаште эртарыме поро йӱлаш савырнен. ты гана пайрем шӱлышан мероприятий 20 мартыште М.Шкетан лӱмеш Марий национальный драме театрыште лие.
Морко кундемын талантан ӱдыр-рвезыже-влак куд автобус дене республикнан рӱдолашкыже толыныт.
Ныл шагат лишан театр полат гӱжлаш тӱҥале. Концерт деч ончыч воштончышан залыштыже кидмастар-влакын выставкышт чоным тарватыш. Сылне марий тӱран тувыр-шовыр ден шовычым, йыли-юли шинчам йымыктарыше шийдарманым, тӱрлӧ сӧрастарышым, вӱдуам тодын ыштыме арвер-влакым ончен, чоным кугешнымаш кумыл авалтыш.
Пайрем концертышкат калык зал тич погынен. Нуным Россий президент пелен калык-влак кокласе кыл шотышто советын еҥже Лариса Яковлева, Марий Эл Кугыжаныш Погын депутат Наталья Пушкина, Морко район администраций вуйлатышын алмаштышыже Алексей Васильев, Йошкар-Оласе Морко землячестве вуйлатыше Лидия Иксанова саламлышт да ончыкшымат кугезе тукымнан йӱлажым, муро да куштымаш поянлыкшым арален кодаш тыланышт.
Концерт программым калык лӱм дене палемдалтше В.Лазарьев лӱмеш академический хор (вуйлатышыже – Е.Григорьева, концертмейстерже – Ю.Осипов) «Ужаргы-лай шовыран», «Кугу олык шудыжым» муро-влак дене почо. Икмыняр йӱк дене йоҥгалтарыме мурсаскам ончаш толшо-шамыч шокшын вашлийыч.
Йошкар-Олаште илыше да тудын унаже-влакым калык лӱмым нумалше «Морко кундем», «Рвезылык», «Кушна мланде», Йоча сымыктыш школ пеленысе «Хорошки», Шеҥше школын туныктышыжо-шамыч, Унчо тӱвыра пӧртын «Унчо ӱжара» ден «У вий», Шлань ялысе клуб пеленысе «Эр кече», Коркатово тӱвыра пӧртын «Куан памаш» да ансамбль-влак чоным тарватыше мурым пӧлеклышт веле огыл, тӱрлӧ куштымашым, семӱзгар дене шоктымо мастарлыкым ончыктышт. А Унчо ден Морко сӱан-шамычым зал калык поснак шокшын вашлие, эсогыл верыште пырля тавалтен, муралтен колтышт.
Морко А мурызо-влак Р.Аюпов, В.Петров, А.Алексеев, А.Генатуллина, С.Богданова, Н.Кузнецова сылне йӱкышт дене пайрем кумылым нӧлтышт. Марий Эл культурын сулло пашаенже Анна Якушеван вуйлатыме калык театрже ты гана «П» буква дене серыме «Пантелей Палычын приёмныйыштыжо» театр миниатюржо дене калыкым воштылтыш, саманлан келшыше теме лачеш лие.
Шочмо кундемнан моторлыкшым моктымо кажне мурым, йӱла ден тӱвырам палыше да арлыше, тукым гыч тукымыш шуен толшо, пашам йӧратыше морко калыкнан мастарлыкым ончыктышо кажне куштымашым ончаш толшо-влак кидым рӱж перен вашлийыч.
Концерт мучашлалтмеке, Лариса Николаевна ден Наталья Васильевна сценыш лекде ышт чыте. Нуно кум шагат шуйнышо концертыште мастарлыкым ончыктышо артист да тудым ямдылымаште тыршыше тӱвыра пашаеҥ-влаклан куаным пӧлеклымыштлан, кугешнаш таратымыштлан таум каласышт.
Тенийысе концерт программым сценыш лукмаште молгунамсе семынак Марий Эл культурын сулло пашаеҥже Юрий Осипов, районысо клуб системым вуйлатыше Владимир Дмитриев тыршеныт, сценарийым Морко тӱвыра пӧртын тӱҥ специалистше Дина Павлова серен, шкежак порын да лыжган тудым вӱден.
Морко кундемыште усталык шӱлышан, кугезе тукымнан йӱлажым, тӱвыражым арален да калык ончылно ончыктен моштышо калык ила, тудым тукым гыч тукымыш шуя. Российысе калык-влакын тӱвыра поянлыкышт идалыклан пӧлеклалтше концертыште тидым эше ик гана нуно пеҥгыдемдышт.
Тек умбакыжат Морко кундемын талант памашыже йоргыктенак йога!
Зоя Берникова, Марий Элын калык артистше:
– Морко кундемын артистше-влак ош вургемышт, ужар сывынышт дене торашке волгалтыт, нуным ончен шочмо мӧҥгышкемат миен тольым, йоча годсо жапыш пӧртыльым. Мурыда-влакат ойыртемалтыт, тошто годсым арален кодымо шижалтеш. Те, морко-влак, чын марий мурым муреда, тудын ямжым, семжым арален коден моштенда. Тендам ончен моткоч куаненам, тендан дене пырля чонем мурен, эсогыл коклан шинчавӱдымат ӱштылаш шым аптыране.
А.БАЙКОВА.
