Москваште «Туристический код моей страны, города, посёлка, района – PRO-туризм» III тӱнямбал конкурс эртен. Тушко Марий Эл гычат турист пашам ворандарыше-влак ушненыт да ойыртемалтыныт.
Мутлан, Козьмодемьянскысе тоштер комплекс кок проектым темлен: «Бендериада» мыскара да койдарчык фестиваль да «Курыкмарий-влакын тӱвырашт». Икымшыже 3-шо, весыже 2-шо вер дене палемдалтыныт.
Йошкар-Ола гыч Ксения Скрябина «Йошкар-Олаште – йӧратымаш» романтический прогулко» экскурсий дене кылдалтше проектшылан 3-шо, Татьяна Рыбакова «Йошкин котоход» скандинав коштмаш да куржталмаш дене кажне ийын эртаралтше еш фестивальлан 2-шо верым сеҥен налыныт. Михаил Вахтинов «Элнан историйже, калыкнан историйже – у турист сувенир-влак» проектшылан кумшо вер дене палемдалтын.
Моло ойыртемалтше лӱм-влакымат ончыкташ лиеш. Марий кугыжаныш университетын Калык тӱвыра да тӱвыра кокласе кыл институтшын студентше-шамычат конкурсыш икмыняр пашам темленыт да сеҥыше семын палемдалтыныт.
Каласен кодыман, ты конкурс 30 ий наре эртаралтеш. Тушко Россий рынкыш шке сату ден услугым темлыше ятыр регион ден йот эл ушна.
Светлана Носова
Фотом «Туризм в Марий Эл» воткыл лаштык гыч налме.
