Медведево район Руэм ял шотан илем кумдыкышто айдемылан лӱдыкшым ыштен кертше кушкылым верештыныт.
Тидын нерген Россельхознадзорын Нижегородский область ден Марий Элысе управленийышт увертареныт. Кушкылжо порсыншудо (повилика) маналтеш. Тудын ни вожшо, ни лышташыже уке. Пеледышыже ошо, кына але ужар тӱсан да пеш тыгыде лиеш. Вургыжо шӱртӧ гай, нарынче, ужарге-нарынче але йошкаргырак, вес пеҥгыдырак кушкыл йыр пӱтыралтеш да сокшым йӱын ила. Шукерте огыл эртарыме шымлымаш почеш, порсыншудо кушкыл-влакын пушыштым шижеш да шкаланже келшышым иканаште муэш. Порсыншудо дене заразитлалтше шудо пеш вашке шӱеш, а тудым вольык кочкеш гын, черланен кертеш. Порсыншудо кушкыл-влак коклаште вирус черымат шара. Санденак тудым карантинлык радамыш пуртымо.
Россельхознадзор управлений Нолямучаш ялын 162 гектар кумдыкыштыжо фитосанитарный карантиным увертарен да порсыншудым пытарыме паша радамым палемден.
Вес аяран кушкыл – пӱнчылӱвал полдыран (борщевик Сосновского) – денат Марий Элыште кучедалыт. Тудо айдемын капышкыже логалеш гын, коваштым йӱлалта. Тазалыклан эҥегекым кондымо дене пырля тыгак экосистемым локтылеш да ялозанлык кушкылым ончен куштымо пашалан мешая.
Тыгакше тыгай полдыраным пеледмыж деч ончычак кӱнчен лукман але солыман, але гербицидым шавыман.
Марий Элын Ялозанлык да продовольствий министерствыжын увертарымыж почеш, участкыште пӱнчылӱвал полдыраным пытараш огыл гын, штрафым тӱлаш пуат:
Тыглай граждан-влаклан – 50 тӱжем теҥге марте,
- Должностной лицалан – 100 тӱжем теҥге марте,
- Юридический лицалан – 700 тӱжем теҥге марте.
Тиде аяран кушкылын улмыжым шкеланенда гын, тудым пытарашак тыршыман але верысе кучемыш шижтарыман.
